ദോഹ: ഖത്തറിൽ നവംബർ മാസത്തിൽ ഇടിമിന്നലോടുകൂടിയ മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നൽകി. മാർച്ച് മാസത്തിന് ശേഷം രാജ്യത്ത് ഏറ്റവും കൂടുതൽ ഇടിമിന്നലോടുകൂടിയ മഴ ലഭിക്കുന്ന മാസമാണ് നവംബർ. വരും ദിവസങ്ങളിൽ താപനില ക്രമേണ കുറയുമെന്നും ഇതോടെ ശൈത്യകാലത്തിന് തുടക്കമാകുമെന്നും കാലാവസ്ഥാ വകുപ്പിന്റെ പ്രവചനത്തിൽ വ്യക്തമാക്കുന്നു.
നവംബർ മാസത്തിലെ ശരാശരി താപനില 29.6 ഡിഗ്രി സെൽഷ്യസായിരിക്കുമെന്നാണ് പ്രവചനം. ചരിത്രപരമായ കാലാവസ്ഥാ കണക്കുകൾ പ്രകാരം നവംബറിൽ രേഖപ്പെടുത്തിയ ഏറ്റവും ഉയർന്ന താപനില 38 ഡിഗ്രി സെൽഷ്യസാണ്. 1969ലായിരുന്നു ഇത് രേഖപ്പെടുത്തിയത്.
അതേസമയം, നവംബർ മാസത്തിൽ രേഖപ്പെടുത്തിയ ഏറ്റവും കുറഞ്ഞ താപനില 11.8 ഡിഗ്രി സെൽഷ്യസാണ്. 1963ലാണ് ഈ താപനില രേഖപ്പെടുത്തിയത്.
ശൈത്യകാലത്തിന്റെ വരവറിയിച്ച് വരും ദിവസങ്ങളിൽ രാജ്യത്ത് താപനിലയിൽ ക്രമേണ കുറവുണ്ടാകുമെന്നാണ് കാലാവസ്ഥാ നിരീക്ഷണ വിഭാഗത്തിന്റെ വിലയിരുത്തൽ. നവംബർ മാസത്തിൽ ഇടിമിന്നലോടുകൂടിയ മഴയ്ക്കും സാധ്യതയുള്ളതിനാൽ കാലാവസ്ഥാ മാറ്റങ്ങൾ ശ്രദ്ധിക്കണമെന്നും അധികൃതർ നൽകുന്ന മുന്നറിയിപ്പുകൾ പിന്തുടരണമെന്നും നിർദേശിക്കുന്നു.
ഖത്തറിൽ വേനൽച്ചൂടിന് ശേഷം തണുപ്പ് അനുഭവപ്പെടാൻ തുടങ്ങുന്ന പ്രധാന മാസങ്ങളിലൊന്നാണ് നവംബർ. താപനില കുറയുന്നതോടെ വരും ആഴ്ചകളിൽ രാജ്യത്ത് ശൈത്യകാല കാലാവസ്ഥ കൂടുതൽ അനുഭവപ്പെടുമെന്നാണ് പ്രതീക്ഷ.
