WhatsApp New Rules 2027;ന്യൂഡൽഹി: വാട്‌സ്ആപ്പ് ഉപയോഗിക്കുന്നവർക്ക് 2027 ജനുവരി ഒന്ന് മുതൽ പുതിയ നിബന്ധനകൾ ബാധകമാകും. സൈബർ കുറ്റകൃത്യങ്ങളും സാമ്പത്തിക തട്ടിപ്പുകളും തടയുന്നതിന്റെ ഭാഗമായി മെസേജിങ് ആപ്പുകൾക്ക് ‘സിം ബൈൻഡിങ്’ നിർബന്ധമാക്കാനൊരുങ്ങുകയാണ് കേന്ദ്ര ടെലികോം വകുപ്പ്. ഇതോടെ വാട്‌സ്ആപ്പ് ഉൾപ്പെടെയുള്ള ആപ്പുകൾ ഉപയോഗിക്കുന്നവർ ചില കാര്യങ്ങൾ പ്രത്യേകം ശ്രദ്ധിക്കേണ്ടിവരും.
നിലവിൽ മൊബൈൽ നമ്പർ ഉപയോഗിച്ച് വാട്‌സ്ആപ്പിൽ അക്കൗണ്ട് രജിസ്റ്റർ ചെയ്തശേഷം സിം കാർഡ് ഫോണിൽനിന്ന് മാറ്റിയാലും വൈഫൈ വഴി ആപ്പ് ഉപയോഗിക്കാൻ സാധിക്കും. എന്നാൽ പുതിയ നിബന്ധന പ്രാബല്യത്തിൽ വരുന്നതോടെ രജിസ്റ്റർ ചെയ്ത മൊബൈൽ നമ്പറുമായി ബന്ധപ്പെട്ട സിം കാർഡ് ഫോണിൽ സജീവമായി ഉണ്ടായിരിക്കണമെന്നാണ് നിർദേശം. 2026 ഡിസംബർ 31നകം നിർദേശങ്ങൾ നടപ്പാക്കാനാണ് ആപ്പുകൾക്ക് സമയം നൽകിയിരിക്കുന്നത്.
എന്താണ് സിം ബൈൻഡിങ്?
വാട്‌സ്ആപ്പ്, ടെലഗ്രാം തുടങ്ങിയ മെസേജിങ് ആപ്പുകളിലെ അക്കൗണ്ടുകൾ രജിസ്റ്റർ ചെയ്ത മൊബൈൽ നമ്പറിന്റെ സിം കാർഡുമായി ബന്ധിപ്പിക്കുന്ന സംവിധാനമാണ് സിം ബൈൻഡിങ്. അക്കൗണ്ട് ഉപയോഗിക്കുന്ന ഫോണിൽ ബന്ധപ്പെട്ട സിം കാർഡ് സജീവമായി ഉണ്ടായിരിക്കണം എന്നതാണ് ഇതിന്റെ പ്രധാന വ്യവസ്ഥ.
സിം കാർഡ് ഫോണിൽനിന്ന് നീക്കം ചെയ്യുകയോ നിർജീവമാകുകയോ ചെയ്താൽ ബന്ധപ്പെട്ട ആപ്പിന്റെ പ്രവർത്തനം തടസ്സപ്പെടാൻ സാധ്യതയുണ്ട്. അക്കൗണ്ടുകളുടെ ദുരുപയോഗം തടയുകയും ഉപയോക്താക്കളെ തിരിച്ചറിയുന്നത് കൂടുതൽ എളുപ്പമാക്കുകയുമാണ് ഇതിലൂടെ ലക്ഷ്യമിടുന്നത്.
ആരെയൊക്കെയാണ് പുതിയ നിയമം ബാധിക്കുക?
1. സിം കാർഡ് ഇല്ലാതെ വാട്‌സ്ആപ്പ് ഉപയോഗിക്കുന്നവർ
ഒരു ഫോണിൽ വാട്‌സ്ആപ്പ് രജിസ്റ്റർ ചെയ്തശേഷം സിം കാർഡ് ഊരിമാറ്റി വൈഫൈ വഴി മാത്രം ആപ്പ് ഉപയോഗിക്കുന്നവർക്ക് പുതിയ നിബന്ധന വെല്ലുവിളിയാകാം.
2. മറ്റൊരു ഫോണിൽ വാട്‌സ്ആപ്പ് ഉപയോഗിക്കുന്നവർ
വാട്‌സ്ആപ്പ് അക്കൗണ്ടുമായി ബന്ധിപ്പിച്ച സിം കാർഡ് ഒരു ഫോണിൽ സൂക്ഷിക്കുകയും മറ്റൊരു ഫോണിൽ ആ അക്കൗണ്ട് ഉപയോഗിക്കുകയും ചെയ്യുന്നവർ പുതിയ നിബന്ധനകൾ ശ്രദ്ധിക്കണം.
3. ടാബ്‌ലെറ്റിൽ വാട്‌സ്ആപ്പ് ഉപയോഗിക്കുന്നവർ
സിം കാർഡ് സൗകര്യമില്ലാത്ത ടാബ്‌ലെറ്റുകളിലോ മറ്റ് ഉപകരണങ്ങളിലോ വാട്‌സ്ആപ്പ് ഉപയോഗിക്കുന്നവരെയും ഈ മാറ്റം ബാധിച്ചേക്കാം. അക്കൗണ്ടുമായി ബന്ധിപ്പിച്ച സിം കാർഡിന്റെ സാന്നിധ്യം ഉറപ്പാക്കേണ്ടിവരും.
4. ഒന്നിലധികം സിം കാർഡുകൾ ഉപയോഗിക്കുന്നവർ
രണ്ട് സിം കാർഡുകൾ ഉപയോഗിക്കുന്നവർ വാട്‌സ്ആപ്പ് അക്കൗണ്ട് രജിസ്റ്റർ ചെയ്ത നമ്പറിന്റെ സിം സജീവമാണെന്ന് ഉറപ്പാക്കണം. സിം മാറ്റുകയോ നിർജീവമാകുകയോ ചെയ്യുമ്പോൾ ആപ്പിന്റെ പ്രവർത്തനത്തെ ബാധിക്കാം.
ഏതൊക്കെ ആപ്പുകൾക്ക് നിയമം ബാധകമാകും?
ഇന്ത്യൻ മൊബൈൽ നമ്പറുകൾ ഉപയോഗിച്ച് ഉപയോക്താക്കളെ തിരിച്ചറിയുന്ന മെസേജിങ് ആപ്പുകളെയാണ് പുതിയ നിർദേശം ലക്ഷ്യമിടുന്നത്. വാട്‌സ്ആപ്പ്, ടെലഗ്രാം, സിഗ്നൽ, അരാട്ടൈ, ജിയോകാറ്റ് തുടങ്ങിയ സേവനങ്ങൾ ഇതിന്റെ പരിധിയിൽ വരുമെന്നാണ് റിപ്പോർട്ടുകൾ. ഓരോ ആപ്പിനും ബാധകമായ കൃത്യമായ വ്യവസ്ഥകൾ സംബന്ധിച്ച വിവരങ്ങൾ ഉപയോക്താക്കൾ ഔദ്യോഗിക അറിയിപ്പുകളിലൂടെ പരിശോധിക്കണം.
എന്തുകൊണ്ടാണ് പുതിയ നടപടി?
രാജ്യത്ത് വർധിച്ചുവരുന്ന സൈബർ തട്ടിപ്പുകൾ, വ്യാജ സന്ദേശങ്ങൾ, വ്യക്തിവിവരങ്ങൾ ദുരുപയോഗം ചെയ്തുള്ള തട്ടിപ്പുകൾ, ഡിജിറ്റൽ അറസ്റ്റ് തട്ടിപ്പുകൾ എന്നിവ തടയുകയാണ് കേന്ദ്രസർക്കാരിന്റെ പ്രധാന ലക്ഷ്യം.
സിം കാർഡ് നീക്കം ചെയ്തശേഷവും അതുമായി ബന്ധപ്പെട്ട അക്കൗണ്ടുകൾ പ്രവർത്തിപ്പിക്കാൻ കഴിയുന്ന സാഹചര്യം തട്ടിപ്പുകാർ ദുരുപയോഗം ചെയ്യാനുള്ള സാധ്യതയുണ്ടെന്നാണ് അധികൃതരുടെ വിലയിരുത്തൽ. സിം ബൈൻഡിങ് വഴി അക്കൗണ്ടുകളും സജീവമായ മൊബൈൽ നമ്പറുകളും തമ്മിലുള്ള ബന്ധം ഉറപ്പാക്കാൻ സാധിക്കുമെന്നാണ് പ്രതീക്ഷ.
സാധാരണ വാട്‌സ്ആപ്പ് ഉപയോക്താക്കൾ എന്തുചെയ്യണം?
ഫോണിൽ സിം കാർഡ് ഉപയോഗിച്ച് പതിവുപോലെ വാട്‌സ്ആപ്പ് പ്രവർത്തിപ്പിക്കുന്ന ഭൂരിഭാഗം ഉപയോക്താക്കൾക്കും വലിയ മാറ്റങ്ങൾ അനുഭവപ്പെടാൻ സാധ്യതയില്ല. എന്നാൽ സിം കാർഡ് മറ്റൊരു ഫോണിൽ സൂക്ഷിച്ചുകൊണ്ട് വാട്‌സ്ആപ്പ് ഉപയോഗിക്കുന്നവരും വൈഫൈ മാത്രം ഉപയോഗിക്കുന്നവരും പുതിയ നിബന്ധനകൾ ശ്രദ്ധിക്കണം.
ശ്രദ്ധിക്കുക: 2027 ജനുവരി ഒന്ന് മുതൽ എല്ലാ ഫോണുകളിലും വാട്‌സ്ആപ്പ് പ്രവർത്തനം നിർത്തുമെന്നല്ല പുതിയ നിയമത്തിന്റെ അർഥം. അക്കൗണ്ടുമായി ബന്ധിപ്പിച്ച സജീവ സിം കാർഡ് സംബന്ധിച്ച നിബന്ധനകളാണ് പ്രധാനമായും ബാധകമാകുന്നത്.
