Istisqa Prayer to Be Held Across Qatar Tomorrow ദോഹ: മഴയ്ക്കായുള്ള പ്രത്യേക പ്രാർഥനയായ ഇസ്തിസ്ഖാ നമസ്കാരം വ്യാഴാഴ്ച (നവംബർ 5) ഖത്തറിലുടനീളം നടക്കും. രാജ്യത്തെ മുസ്‌ലിംകൾക്ക് ഇസ്തിസ്ഖാ നമസ്കാരത്തിൽ പങ്കെടുക്കാൻ ഔദ്യോഗികമായി ആഹ്വാനം ചെയ്ത് മതകാര്യ മന്ത്രാലയമായ ഔഖാഫ് പ്രസ്താവന പുറത്തിറക്കി.
വ്യാഴാഴ്ച രാവിലെ 5.59നാണ് നമസ്കാരം നിശ്ചയിച്ചിരിക്കുന്നത്. രാജ്യത്തിന്റെ വിവിധ ഭാഗങ്ങളിലായി 136 പള്ളികളിലും പ്രാർഥനാ കേന്ദ്രങ്ങളിലും ഇതിനുള്ള സൗകര്യം ഒരുക്കിയതായി എൻഡോവ്മെന്റ്‌സ് ആൻഡ് ഇസ്‌ലാമിക് അഫയേഴ്‌സ് മന്ത്രാലയം അറിയിച്ചു.
മഴയ്ക്കായുള്ള പ്രാർഥനയിൽ പങ്കെടുക്കാൻ കഴിയുന്ന എല്ലാ വിശ്വാസികളും എത്തിച്ചേരണമെന്ന് മന്ത്രാലയം അഭ്യർഥിച്ചു. പ്രാർഥനയുടെ ഭാഗമായി ആത്മാർഥമായ പശ്ചാത്താപം, മറ്റുള്ളവരുടെ അവകാശങ്ങൾ തിരികെ നൽകൽ, നോമ്പനുഷ്ഠിക്കൽ, ദാനധർമങ്ങൾ എന്നിവ ഉൾപ്പെടെയുള്ള ആരാധനാകർമങ്ങളിൽ വിശ്വാസികൾ ശ്രദ്ധിക്കണമെന്നും പ്രസ്താവനയിൽ നിർദേശിച്ചു.
മഴ ലഭിക്കാത്ത സാഹചര്യത്തിൽ അല്ലാഹുവിനോട് മഴയ്ക്കായി പ്രാർഥിക്കുന്ന ഇസ്‌ലാമിക ആചാരമാണ് സ്വലാത്തുൽ ഇസ്തിസ്ഖാ. പ്രവാചകൻ മുഹമ്മദ് നബി (സ)യുടെ ചര്യയുടെ ഭാഗമായി അനുഷ്ഠിച്ചുവരുന്ന ഈ പ്രത്യേക നമസ്കാരത്തിൽ വിശ്വാസികൾ ഒരുമിച്ചുകൂടി മഴയ്ക്കും അനുഗ്രഹത്തിനുമായി പ്രാർഥിക്കും.
ഖത്തർ അമീർ ശൈഖ് തമീം ബിൻ ഹമദ് അൽഥാനിയും രാജ്യത്തുടനീളം ഇസ്തിസ്ഖാ നമസ്കാരം നിർവഹിക്കാൻ ആഹ്വാനം ചെയ്തിട്ടുണ്ട്. ലുസൈൽ പ്രാർഥനാ മൈതാനിയിൽ വിശ്വാസികൾക്കൊപ്പം അമീറും നമസ്കാരത്തിൽ പങ്കെടുക്കും.
നമസ്കാര സമയം: രാവിലെ 5.59
ദിവസം: വ്യാഴാഴ്ച, നവംബർ 5
പ്രാർഥനാ കേന്ദ്രങ്ങൾ: ഖത്തറിലുടനീളം 136 പള്ളികളും ഈദ്ഗാഹുകളും.
പ്രാർഥനാ കേന്ദ്രങ്ങളുടെ പൂർണ പട്ടിക ഔഖാഫ് മന്ത്രാലയം പ്രസിദ്ധീകരിച്ചിട്ടുണ്ട്.
