Home Gardening and Cultivation ദോഹ: പരിസ്ഥിതി സംരക്ഷണവും വീടുകളിൽ കൃഷി പ്രോത്സാഹിപ്പിക്കലും ലക്ഷ്യമിട്ട് അൽ വക്ര മുനിസിപ്പാലിറ്റി 10,000 തൈകൾ സൗജന്യമായി വിതരണം ചെയ്യുന്നു. ‘അൽ വക്ര ഗോസ് ഗ്രീൻ’ എന്ന പേരിലുള്ള പരിസ്ഥിതി പദ്ധതിയുടെ ഭാഗമായാണ് നടപടി. നവംബർ 8 മുതൽ 12 വരെ അഞ്ച് ദിവസങ്ങളിലായാണ് തൈകൾ വിതരണം ചെയ്യുന്നത്. അൽ വക്ര പബ്ലിക് പാർക്കിൽ രാവിലെ 7 മുതൽ 11 വരെയാണ് വിതരണ സമയം. താമസക്കാർക്ക് വിവിധയിനം ചെടികളുടെ തൈകൾ സൗജന്യമായി ലഭ്യമാക്കും.
തൈകൾക്കൊപ്പം ജൈവവളവും സൗജന്യമായി വിതരണം ചെയ്യും. വീടുകളിൽ ചെടികൾ വളർത്താനും ഹരിത ഇടങ്ങൾ വികസിപ്പിക്കാനും താമസക്കാരെ പ്രോത്സാഹിപ്പിക്കുകയാണ് ഇതിലൂടെ ലക്ഷ്യമിടുന്നത്. പദ്ധതിയുടെ ഭാഗമായി 10 സ്കൂളുകളിൽ പരിസ്ഥിതി ബോധവത്കരണ സന്ദർശനങ്ങളും സംഘടിപ്പിക്കും. വിദ്യാർഥികളിൽ പരിസ്ഥിതി സംരക്ഷണത്തിന്റെ പ്രാധാന്യം വളർത്തുന്നതിനും സുസ്ഥിരമായ ജീവിതരീതികളെക്കുറിച്ച് അവബോധം സൃഷ്ടിക്കുന്നതിനുമാണ് സന്ദർശനങ്ങൾ.
പരിസ്ഥിതി സംരക്ഷണ പ്രവർത്തനങ്ങളിൽ പൊതുജനങ്ങളുടെ പങ്കാളിത്തം ഉറപ്പാക്കുക, നഗരത്തിലെ ഹരിത ഇടങ്ങൾ വർധിപ്പിക്കുക, പുതിയ തലമുറയിൽ പ്രകൃതിസംരക്ഷണ മനോഭാവം വളർത്തുക എന്നിവയാണ് പദ്ധതിയുടെ പ്രധാന ലക്ഷ്യങ്ങൾ. വീടുകളിൽ തന്നെ കൃഷിയും പൂന്തോട്ടപരിപാലനവും എളുപ്പമാക്കുന്നതിലൂടെ ആരോഗ്യകരവും ഹരിതാഭവുമായ പരിസ്ഥിതി സൃഷ്ടിക്കാൻ താമസക്കാർക്കും പങ്കാളികളാകാമെന്ന് മുനിസിപ്പാലിറ്റി പ്രതീക്ഷിക്കുന്നു.
തൈകൾ ലഭിക്കുന്നതിനുള്ള സമയം:
- തീയതി: നവംബർ 8 മുതൽ 12 വരെ
- സ്ഥലം: അൽ വക്ര പബ്ലിക് പാർക്ക്
- സമയം: രാവിലെ 7 മുതൽ 11 വരെ
- വിതരണം: 10,000 സൗജന്യ തൈകളും ജൈവവളവും.
