Amir receives phone call from US president ദോഹ: ഖത്തർ അമീർ ശൈഖ് തമീം ബിൻ ഹമദ് അൽഥാനിയുമായി യുഎസ് പ്രസിഡന്റ് ഡോണൾഡ് ട്രംപ് ഫോണിൽ സംസാരിച്ചു. വെള്ളിയാഴ്ച നടന്ന സംഭാഷണത്തിൽ ഇരു രാജ്യങ്ങളും തമ്മിലുള്ള തന്ത്രപ്രധാന ബന്ധങ്ങളും സഹകരണം ശക്തിപ്പെടുത്താനുള്ള മാർഗങ്ങളും ചർച്ചയായി.
മേഖലയിലെ പുതിയ സംഭവവികാസങ്ങളും സംഘർഷങ്ങൾ കുറയ്ക്കുന്നതിനുള്ള നയതന്ത്ര ശ്രമങ്ങളും ഇരുനേതാക്കളും വിലയിരുത്തി. വിവിധ കക്ഷികൾക്കിടയിലെ ഭിന്നതകൾ പരിഹരിച്ച് സമഗ്രമായ ധാരണയിലെത്താൻ ഖത്തർ നടത്തുന്ന മധ്യസ്ഥ ശ്രമങ്ങളും ചർച്ചയായി.
സംഘർഷങ്ങൾ രൂക്ഷമാകുന്നത് ഒഴിവാക്കാൻ സംഭാഷണത്തിനും നയതന്ത്ര മാർഗങ്ങൾക്കും മുൻഗണന നൽകണമെന്ന് അമീർ വ്യക്തമാക്കി. സമുദ്രഗതാഗത സ്വാതന്ത്ര്യവും ഊർജവിതരണ സുരക്ഷയും ഉറപ്പാക്കേണ്ടതിന്റെ പ്രാധാന്യവും അദ്ദേഹം ചൂണ്ടിക്കാട്ടി.
