Dubai Metro extends ദുബായ് മെട്രോ സർവീസ് അൽ മക്തൂം അന്താരാഷ്ട്ര വിമാനത്താവളത്തിലേക്ക് (DWC) നീട്ടുന്നതിനുള്ള പദ്ധതിക്ക് അംഗീകാരം ലഭിച്ചു. മെട്രോയുടെ റൂട്ട് 2020 വിപുലീകരിച്ച് വിമാനത്താവളവുമായി ബന്ധിപ്പിക്കുന്ന പദ്ധതിയുടെ നിർമാണം പൂർത്തിയാക്കി 2031ൽ സർവീസ് ആരംഭിക്കാനാണ് ലക്ഷ്യമിടുന്നത്. ദുബായ് കിരീടാവകാശിയും എക്സിക്യൂട്ടീവ് കൗൺസിൽ ചെയർമാനുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമാണ് ഇക്കാര്യം പ്രഖ്യാപിച്ചത്.

2 ബില്യൺ ദിർഹം ചെലവ് പ്രതീക്ഷിക്കുന്ന പദ്ധതിയിലൂടെ ദുബായ് മെട്രോ ശൃംഖലയും ലോകത്തിലെ ഏറ്റവും വലിയ വിമാനത്താവളമായി മാറാൻ ലക്ഷ്യമിടുന്ന അൽ മക്തൂം അന്താരാഷ്ട്ര വിമാനത്താവളവും നേരിട്ട് ബന്ധിപ്പിക്കും. വിമാനയാത്രക്കാർക്കും വിമാനത്താവള ജീവനക്കാർക്കും സമീപപ്രദേശങ്ങളിലെത്തുന്ന സന്ദർശകർക്കും പുതിയ മെട്രോ സർവീസ് ഏറെ പ്രയോജനപ്പെടുമെന്നാണ് വിലയിരുത്തൽ.

വിമാനത്താവള നഗരത്തിനുള്ളിൽ സ്വകാര്യ വാഹനങ്ങളെ ആശ്രയിക്കുന്നത് കുറയ്ക്കാനും യാത്ര കൂടുതൽ സുഗമമാക്കാനും പദ്ധതി സഹായിക്കും. വിമാനത്താവള എക്സ്പ്രസ് ലൈനുമായും ഇത്തിഹാദ് റെയിലിന്റെ അതിവേഗ റെയിൽ ശൃംഖലയുമായും ബന്ധം സ്ഥാപിക്കാനും ഇതിലൂടെ ലക്ഷ്യമിടുന്നുണ്ട്.

റൂട്ട് 2020 വിപുലീകരിക്കുന്നു

ദുബായ് മെട്രോയുടെ റെഡ് ലൈനിൽനിന്ന് 15 കിലോമീറ്റർ ദൈർഘ്യത്തിൽ നീട്ടിയ റൂട്ട് 2020 ആറ് വർഷം മുമ്പാണ് ഉദ്ഘാടനം ചെയ്തത്. യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമാണ് പദ്ധതി ഉദ്ഘാടനം ചെയ്തത്.

ദുബായിലെ വിവിധ ജനവാസ മേഖലകളെ അൽ മക്തൂം അന്താരാഷ്ട്ര വിമാനത്താവളവുമായി ബന്ധിപ്പിക്കുന്നതിനുള്ള പ്രധാന ഗതാഗത പദ്ധതിയായാണ് റൂട്ട് 2020 തുടക്കം മുതൽ വിലയിരുത്തപ്പെട്ടത്. പുതിയ വിപുലീകരണത്തിലൂടെ ഈ പാത വിമാനത്താവളത്തിന്റെ വെസ്റ്റ് ടെർമിനൽ വരെ എത്തും.

അതേസമയം, ദുബായ് അന്താരാഷ്ട്ര വിമാനത്താവളമായ DXB-യെയും അൽ മക്തൂം അന്താരാഷ്ട്ര വിമാനത്താവളമായ DWC-യെയും ബന്ധിപ്പിക്കാൻ നിർദേശിച്ചിട്ടുള്ള പ്രത്യേക എയർപോർട്ട് എക്സ്പ്രസ് ലൈനിൽനിന്ന് വ്യത്യസ്തമാണ് റൂട്ട് 2020 വിപുലീകരണ പദ്ധതി.

11 ബില്യൺ ദിർഹത്തിന്റെ പദ്ധതികൾക്ക് അംഗീകാരം

യുഎഇ ഗവൺമെന്റിന്റെ വാർഷിക യോഗങ്ങളോടനുബന്ധിച്ച് ചേർന്ന ദുബായ് എക്സിക്യൂട്ടീവ് കൗൺസിൽ യോഗത്തിലാണ് മെട്രോ വിപുലീകരണ പദ്ധതിക്ക് അംഗീകാരം നൽകിയത്. 11 ബില്യൺ ദിർഹത്തിലധികം ചെലവ് പ്രതീക്ഷിക്കുന്ന വിവിധ തന്ത്രപ്രധാന പദ്ധതികൾക്കും യോഗം അംഗീകാരം നൽകി.

2040ഓടെ ദുബായിലെ സമൂഹസേവനങ്ങളും പൊതുസൗകര്യങ്ങളും മെച്ചപ്പെടുത്തുന്നതിനുള്ള സമഗ്ര പദ്ധതിയും ഇതിൽ ഉൾപ്പെടുന്നു. എമിറാത്തി പൗരന്മാർ താമസിക്കുന്ന മേഖലകൾക്ക് പ്രത്യേക പരിഗണന നൽകിക്കൊണ്ട് അടിസ്ഥാന സൗകര്യങ്ങൾ വികസിപ്പിക്കുകയാണ് പദ്ധതിയുടെ ലക്ഷ്യം.

ദുബായിലെ റിയൽ എസ്റ്റേറ്റ് വിപണിയുടെ ഭാവിയെക്കുറിച്ച് നടത്തിയ പഠനത്തിന്റെ കണ്ടെത്തലുകൾക്കും യോഗം അംഗീകാരം നൽകി. മേഖലയിലെ ശക്തിയും പ്രതിരോധശേഷിയും വ്യക്തമാക്കുന്ന പഠനം സ്വകാര്യ മേഖലയുമായുള്ള സഹകരണത്തിലൂടെ റിയൽ എസ്റ്റേറ്റ് രംഗത്തിന്റെ തുടർവളർച്ചയ്ക്ക് സഹായകമാകുമെന്ന് ഷെയ്ഖ് ഹംദാൻ വ്യക്തമാക്കി.

പ്രായപൂർത്തിയാകാത്തവർക്കും വഖഫ് സ്ഥാപനങ്ങൾക്കുമായി കൈവശമുള്ള ഫണ്ടുകളുടെ നിക്ഷേപ നയം വൈവിധ്യവത്കരിക്കുന്നതിനുള്ള നടപടികളും നിർദേശിച്ചതായി അദ്ദേഹം അറിയിച്ചു. നിക്ഷേപ പോർട്ട്ഫോളിയോയുടെ കാര്യക്ഷമമായ നടത്തിപ്പ്, ആസ്തികളുടെ വൈവിധ്യവത്കരണം, മികച്ച വരുമാനം, ദീർഘകാല സാമ്പത്തിക സുസ്ഥിരത എന്നിവ ഉറപ്പാക്കുകയാണ് ലക്ഷ്യം.

ഷെയ്ഖ് മുഹമ്മദ് ബിൻ റാഷിദിന്റെ കാഴ്ചപ്പാടുകൾക്ക് അനുസൃതമായി ദുബായിലെ ജീവിതനിലവാരം മെച്ചപ്പെടുത്താനും ആഗോളതലത്തിലുള്ള മത്സരശേഷി ശക്തിപ്പെടുത്താനും സർക്കാർ പ്രതിജ്ഞാബദ്ധമാണെന്നും ഷെയ്ഖ് ഹംദാൻ വ്യക്തമാക്കി. ജനങ്ങളുടെ ദൈനംദിന ജീവിതത്തിൽ പദ്ധതികൾ സൃഷ്ടിക്കുന്ന മാറ്റങ്ങളും ഭാവിതലമുറയ്ക്ക് ലഭിക്കുന്ന അവസരങ്ങളുമാണ് വികസനത്തിന്റെ വിജയമായി കണക്കാക്കുന്നതെന്നും അദ്ദേഹം കൂട്ടിച്ചേർത്തു.