Kuwait salary deduction rules : കുവൈത്ത് സിറ്റി: ശമ്പളം നൽകുന്നതുമായി ബന്ധപ്പെട്ട പ്രശ്നങ്ങൾ കാരണം കുവൈത്തിൽ 8,849 തൊഴിലുടമ ഫയലുകളിൽ നിയമലംഘനങ്ങൾ കണ്ടെത്തിയതായി പബ്ലിക് അതോറിറ്റി ഫോർ മാൻപവർ (PAM) അറിയിച്ചു. അഞ്ച് അല്ലെങ്കിൽ അതിലധികം ജീവനക്കാരുള്ള കമ്പനികളുടെ ഫയലുകളിലാണ് ഈ പ്രശ്നങ്ങൾ റിപ്പോർട്ട് ചെയ്തിരിക്കുന്നത്.
വേതന നിരീക്ഷണ സംവിധാനത്തിൽ ആകെ 100,252 തൊഴിലുടമ ഫയലുകൾ രജിസ്റ്റർ ചെയ്തിട്ടുണ്ട്. ഇതിൽ 51,844 ഫയലുകൾ അഞ്ച് പേരിൽ താഴെ ജീവനക്കാരുള്ള സ്ഥാപനങ്ങളുടേതാണ്. അഞ്ച് അല്ലെങ്കിൽ അതിലധികം ജീവനക്കാരുള്ള സ്ഥാപനങ്ങളുടെ ഫയലുകൾ 48,408 ആണ്. ഈ വിഭാഗത്തിലാണ് ശമ്പളവുമായി ബന്ധപ്പെട്ട പ്രശ്നങ്ങൾ കണ്ടെത്തിയ 8,849 ഫയലുകൾ ഉൾപ്പെടുന്നത്.
ശമ്പളത്തിൽ കുറവ് വരുത്താൻ 13 കാരണങ്ങൾ
ജീവനക്കാരുടെ ശമ്പളത്തിൽ നിന്ന് തുക കുറയ്ക്കാൻ അനുവദിക്കുന്ന 13 സാധുവായ കാരണങ്ങളും പിഎഎം വ്യക്തമാക്കിയിട്ടുണ്ട്. ശമ്പളമില്ലാത്ത അവധി, ശിശുപരിപാലന അവധി, അസുഖ അവധി, ഭാഗികമായി ശമ്പളം ലഭിക്കുന്ന അവധി, ജോലിയിൽ നിന്നുള്ള സസ്പെൻഷൻ തുടങ്ങിയവ ഇതിൽ ഉൾപ്പെടുന്നു.
ജോലിസ്ഥലത്തുനിന്ന് അനധികൃതമായി വിട്ടുനിൽക്കുക, ജോലി ചെയ്യാൻ വിസമ്മതിക്കുക, ജോലിക്ക് ഹാജരാകാതിരിക്കുക തുടങ്ങിയ സാഹചര്യങ്ങളിലും നിയമാനുസൃതമായ നിബന്ധനകൾക്ക് വിധേയമായി ശമ്പളത്തിൽ കുറവ് വരുത്താം.
ജീവനക്കാരന്റെ തൊഴിൽസ്ഥിതിയുമായി ബന്ധപ്പെട്ട മറ്റ് കാരണങ്ങളും പരിഗണിക്കാമെങ്കിലും, ശമ്പളത്തിൽ നിന്ന് തുക കുറയ്ക്കുന്നതിന്റെ നിയമസാധുതയും ന്യായീകരണവും തെളിയിക്കുന്ന രേഖകൾ തൊഴിലുടമ സമർപ്പിക്കണം.
ശമ്പളക്കിഴിവിന് 25 ശതമാനം പരിധി
ശമ്പളത്തിൽ നിന്ന് തുക കുറയ്ക്കുന്നതിന് കർശനമായ പരിധികളും ബാധകമാണ്. ഒരു മാസത്തിൽ ജീവനക്കാരന്റെ ശമ്പളത്തിൽ നിന്ന് പരമാവധി 25 ശതമാനം വരെ മാത്രമേ കുറയ്ക്കാൻ കഴിയൂ. കിഴിവ് നിയമാനുസൃതമാണെന്ന് തെളിയിക്കുന്ന രേഖകളും ഇതിന് ആവശ്യമാണ്.
തൊഴിലുടമകൾ വേതനവുമായി ബന്ധപ്പെട്ട നിയമങ്ങളും ചട്ടങ്ങളും പാലിക്കുന്നുണ്ടെന്ന് ഉറപ്പാക്കുന്നതിനും ജീവനക്കാരുടെ അവകാശങ്ങൾ സംരക്ഷിക്കുന്നതിനുമുള്ള നടപടികളുടെ ഭാഗമായാണ് പിഎഎമ്മിന്റെ ഈ നിർദേശങ്ങൾ.
