Qatar winter camping season : ദോഹ: ഖത്തറിലെ 2026–2027 ശൈത്യകാല ക്യാമ്പിംഗ് സീസൺ ആരംഭിച്ചു. 2027 ഏപ്രിൽ 20 വരെ സീസൺ തുടരും. എല്ലാ മേഖലകളിലേക്കുമുള്ള ക്യാമ്പിംഗ് രജിസ്ട്രേഷൻ ഒക്ടോബർ 31 വരെ വീണ്ടും തുറന്നിട്ടുണ്ട്. പരിസ്ഥിതി, കാലാവസ്ഥാ വ്യതിയാന മന്ത്രാലയത്തിന്റെ ഇലക്ട്രോണിക് സംവിധാനത്തിലൂടെയും ‘ബീ’ ആപ്പിലൂടെയും രജിസ്റ്റർ ചെയ്യാം.
ക്യാമ്പിംഗ് സൈറ്റുകളിൽ വലിയ തിരക്ക്
ക്യാമ്പിംഗ് സൈറ്റുകൾക്കായി വലിയ തോതിലുള്ള ബുക്കിംഗാണ് നടന്നത്. മധ്യമേഖലയിലെ 90 ശതമാനം സൈറ്റുകളും വടക്കൻ, തെക്കൻ മേഖലകളിലെ 98 ശതമാനം സൈറ്റുകളും ബുക്ക് ചെയ്തതായി റിപ്പോർട്ടുകൾ വ്യക്തമാക്കുന്നു. ചില പ്രദേശങ്ങളിലെ സൈറ്റുകൾ രജിസ്ട്രേഷൻ ആരംഭിച്ച് ഒരു മിനിറ്റിനുള്ളിൽ തന്നെ ബുക്ക് ചെയ്തിരുന്നു.
വെബ്‌സൈറ്റിലും ബീ ആപ്പിലും രജിസ്ട്രേഷൻ സുഗമമാക്കുന്നതിനായി മന്ത്രാലയം ഇലക്ട്രോണിക് സംവിധാനം വികസിപ്പിച്ചിട്ടുണ്ട്. വടക്കൻ, തെക്കൻ മേഖലകളിൽ രജിസ്ട്രേഷൻ സമയത്ത് വെബ്‌സൈറ്റിൽ വലിയ തിരക്ക് അനുഭവപ്പെട്ടിരുന്നു.
സീലൈൻ മുതൽ ഖോർ അൽ അദൈദ് വരെ വാഹന നിയന്ത്രണം
ശൈത്യകാല ക്യാമ്പിംഗ് സീസണിൽ കടൽത്തീരങ്ങളുടെ പരിസ്ഥിതി സംരക്ഷിക്കുന്നതിനും സന്ദർശകരുടെ സുരക്ഷ ഉറപ്പാക്കുന്നതിനുമായി ആഭ്യന്തര സുരക്ഷാ സേനയായ ലെഖ്‌വിയയുടെ പരിസ്ഥിതി സുരക്ഷാ വിഭാഗവും പരിസ്ഥിതി, കാലാവസ്ഥാ വ്യതിയാന മന്ത്രാലയവും സംയുക്തമായി പരിശോധനകൾ ശക്തമാക്കി.
സീലൈൻ മുതൽ ഖോർ അൽ അദൈദ് വരെയുള്ള ബീച്ചുകളിൽ വാഹനങ്ങൾ ഓടിക്കുന്നതുമായി ബന്ധപ്പെട്ട നിയന്ത്രണങ്ങൾ കർശനമായി നിരീക്ഷിക്കും. തീരപ്രദേശങ്ങളിൽ വാഹനങ്ങൾ ഓടിക്കുമ്പോൾ കരയിൽനിന്ന് കുറഞ്ഞത് 30 മീറ്റർ അകലം പാലിക്കണമെന്ന് അധികൃതർ നിർദേശിച്ചു.
വന്യജീവികളെയും അവയുടെ സ്വാഭാവിക ആവാസവ്യവസ്ഥകളെയും സംരക്ഷിക്കുന്നതിനുള്ള 2004ലെ 19-ാം നമ്പർ നിയമം ലംഘിക്കുന്നവർക്ക് 100,000 ഖത്തർ റിയാൽ വരെ പിഴയും തടവും വാഹനങ്ങൾ കണ്ടുകെട്ടുന്നതുൾപ്പെടെയുള്ള നടപടികളും നേരിടേണ്ടിവരും.
ക്യാമ്പിംഗ് സൈറ്റുകളിൽ പാലിക്കേണ്ട നിയമങ്ങൾ
ക്യാമ്പിംഗ് നടത്തുന്നവർ താഴെ പറയുന്ന നിർദേശങ്ങൾ പാലിക്കണമെന്ന് മന്ത്രാലയം അറിയിച്ചു.
- അനുവദിച്ച സ്ഥലങ്ങളിൽ മാത്രം ക്യാമ്പിംഗ്: പെർമിറ്റിൽ രേഖപ്പെടുത്തിയ സ്ഥലത്തുതന്നെ ക്യാമ്പ് സ്ഥാപിക്കണം. സ്ഥലം മാറ്റാൻ ബന്ധപ്പെട്ട അധികൃതരുടെ അനുമതി ആവശ്യമാണ്.
- ടെന്റുകൾ തമ്മിലുള്ള അകലം: ഓരോ ടെന്റും തമ്മിൽ കുറഞ്ഞത് അഞ്ച് മീറ്റർ അകലം ഉണ്ടായിരിക്കണം.
- മോട്ടോർ സൈക്കിൾ നിയന്ത്രണം: പാർക്കിനുള്ളിൽ മോട്ടോർ സൈക്കിളുകൾ ഉപയോഗിക്കുന്നതും ഓടിക്കുന്നതും നിരോധിച്ചിട്ടുണ്ട്. എല്ലാ ക്യാമ്പിംഗ് മേഖലകളിലും രാത്രി 10 മുതൽ പുലർച്ചെ 5 വരെ മോട്ടോർ സൈക്കിൾ ഉപയോഗിക്കാനും പാടില്ല.
- വെളിച്ചത്തിന്റെ ഉപയോഗം: ഊർജക്ഷമതയുള്ള ലൈറ്റുകൾ ഉപയോഗിക്കണം. ആവശ്യത്തിന് മാത്രം വെളിച്ചം നൽകുകയും വെളിച്ചം പരമാവധി താഴേക്കു കേന്ദ്രീകരിക്കുകയും വേണം.
- മാലിന്യ സംസ്കരണം: മാലിന്യങ്ങൾ നിശ്ചിത പാത്രങ്ങളിൽ നിക്ഷേപിക്കണം. ക്യാമ്പിംഗ് സ്ഥലവും പരിസരവും വൃത്തിയായി സൂക്ഷിക്കണം.
പരിസ്ഥിതി സംരക്ഷണത്തിന് മുൻഗണന
പ്രകാശ മലിനീകരണം കുറയ്ക്കുന്നതിനും തീരദേശ പരിസ്ഥിതിയും വന്യജീവികളുടെ ആവാസവ്യവസ്ഥയും സംരക്ഷിക്കുന്നതിനും ക്യാമ്പർമാർ സഹകരിക്കണമെന്ന് അധികൃതർ അഭ്യർഥിച്ചു.
കഴിഞ്ഞ സീസണിലെ പൊതുജനാഭിപ്രായങ്ങളും നിർദേശങ്ങളും വിലയിരുത്തിയാണ് ഇത്തവണ ക്യാമ്പിംഗ് സേവനങ്ങൾ മെച്ചപ്പെടുത്തുന്നതിനുള്ള നടപടികൾ സ്വീകരിക്കുന്നതെന്ന് പരിസ്ഥിതി, കാലാവസ്ഥാ വ്യതിയാന മന്ത്രാലയം അറിയിച്ചു. ക്യാമ്പർമാർക്ക് മികച്ച സൗകര്യങ്ങൾ ഉറപ്പാക്കുന്നതിനൊപ്പം പ്രകൃതിയെ സംരക്ഷിക്കുകയുമാണ് ലക്ഷ്യം.
