കുവൈത്ത് സിറ്റി: കുവൈത്തിലെ സാൽമി റോഡിൽ ചില വാഹനയാത്രക്കാർ അപകടകരമായ രീതിയിൽ വാഹനമോടിക്കുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ ശ്രദ്ധ നേടുന്നു. വാഹനങ്ങളുടെ ലൈറ്റുകൾ തെളിക്കാതെയും വേഗപരിധി ലംഘിച്ചും ചിലർ യാത്ര ചെയ്യുന്നതായി നൈഫ് ബിൻ തവാലെ പങ്കുവെച്ച വീഡിയോയിൽ ആരോപിക്കുന്നു.
യാത്രയ്ക്കിടെ മുന്നറിയിപ്പോ ഹെഡ്‌ലൈറ്റ് ഫ്ലാഷോ നൽകാതെ വാഹനങ്ങൾ പെട്ടെന്ന് പിന്നിൽ അപകടകരമായ രീതിയിൽ അടുത്തെത്തിയത് തന്നെ ഞെട്ടിച്ചുവെന്ന് അദ്ദേഹം പറഞ്ഞു. വാഹനങ്ങളുടെ ലൈറ്റുകൾ ഓഫ് ചെയ്തുള്ള യാത്രയും അമിതവേഗവും മറ്റ് റോഡ് ഉപയോക്താക്കൾക്കും വലിയ അപകടസാധ്യത സൃഷ്ടിക്കുന്നുണ്ടെന്നും അദ്ദേഹം ചൂണ്ടിക്കാട്ടി.
പ്രത്യേകിച്ച് ഉയർന്ന വേഗത്തിൽ വാഹനമോടിക്കുമ്പോൾ മുന്നിലുള്ള വാഹനത്തോട് സുരക്ഷിതമായ അകലം പാലിക്കാതിരിക്കുന്നത് അപകടസാധ്യത വർധിപ്പിക്കും. കാഴ്ചപരിമിതിയുള്ള സാഹചര്യങ്ങളിൽ ലൈറ്റുകൾ തെളിക്കാതെ യാത്ര ചെയ്യുന്നതും അപകടങ്ങൾക്ക് കാരണമാകാം.
ഇത്തരം അശ്രദ്ധമായ ഡ്രൈവിങ് അംഗീകരിക്കാനാവില്ലെന്നും നിയമം ലംഘിക്കുന്നവർക്കെതിരെ കർശന നടപടി സ്വീകരിക്കണമെന്നും നൈഫ് ബിൻ തവാലെ ആവശ്യപ്പെട്ടു. കുവൈത്തിലെ റോഡുകളിൽ വാഹനമോടിക്കുന്നവർ ഗതാഗത നിയമങ്ങൾ പാലിക്കണമെന്നും മറ്റ് യാത്രക്കാരുടെ സുരക്ഷ ഉറപ്പാക്കണമെന്നും സംഭവം വീണ്ടും ഓർമിപ്പിക്കുന്നു.
