Daily Assistance for Passport and PCC Services ദോഹ: ഖത്തറിലുള്ള ഇന്ത്യൻ പ്രവാസികൾക്ക് പാസ്‌പോർട്ട് പുതുക്കുന്നതിനും പോലീസ് ക്ലിയറൻസ് സർട്ടിഫിക്കറ്റ് (പി.സി.സി) ലഭിക്കുന്നതിനുമുള്ള അപേക്ഷാ നടപടികൾ എളുപ്പമാക്കാൻ ഇന്ത്യൻ കൾചറൽ സെന്റർ (ഐ.സി.സി) പ്രത്യേക സേവനങ്ങൾ ഒരുക്കി. ആഴ്ചയിൽ ഏഴു ദിവസവും ലഭ്യമാകുന്ന സേവനത്തിലൂടെ പാസ്‌പോർട്ടും മറ്റ് കോൺസുലാർ നടപടികളുമായി ബന്ധപ്പെട്ട അപേക്ഷകൾ സമർപ്പിക്കാൻ ആവശ്യമായ സഹായം ലഭിക്കും.
നവജാത ശിശുക്കൾക്കുള്ള പാസ്‌പോർട്ട് അപേക്ഷ, മുതിർന്നവരുടെയും കുട്ടികളുടെയും പാസ്‌പോർട്ട് പുതുക്കൽ, കേടുപാടുകൾ സംഭവിച്ച പാസ്‌പോർട്ടിന് പകരം പുതിയത് ലഭിക്കുന്നതിനുള്ള അപേക്ഷ, തത്കാൽ പാസ്‌പോർട്ട് പുതുക്കൽ, പി.സി.സി അപേക്ഷ എന്നിവയ്ക്കാണ് ഐ.സി.സിയുടെ സഹായം ലഭിക്കുക. പാസ്‌പോർട്ടിന്റെ കാലാവധി അവസാനിക്കുന്നതിന് ഒരു വർഷം മുമ്പ് മുതൽ പുതുക്കുന്നതിനുള്ള അപേക്ഷ നൽകാനും സാധിക്കും.
ഓൺലൈൻ അപേക്ഷാ ഫോമുകൾ പൂരിപ്പിക്കൽ, ഡിജിറ്റൽ ഫോട്ടോ എടുക്കൽ, അപേക്ഷാ നടപടികൾ പൂർത്തിയാക്കുന്നതിനുള്ള നേരിട്ടുള്ള സഹായം എന്നിവയും കേന്ദ്രത്തിൽ ലഭ്യമാണ്.
സേവനകേന്ദ്രവും പ്രവർത്തനസമയവും
ദോഹയിലെ അബുഹമൂറിലുള്ള മാമൂറയിലാണ് ഇന്ത്യൻ കൾചറൽ സെന്റർ പ്രവർത്തിക്കുന്നത്. ഞായർ മുതൽ വ്യാഴം വരെയും ശനിയാഴ്ചയും രാവിലെ 9 മുതൽ ഉച്ചയ്ക്ക് 1 വരെയും വൈകീട്ട് 4.30 മുതൽ രാത്രി 9 വരെയുമാണ് സേവനം.
വെള്ളിയാഴ്ച രാവിലെ 9 മുതൽ 11 വരെയും വൈകീട്ട് 4.30 മുതൽ രാത്രി 9 വരെയും സേവനം ലഭിക്കും.
സ്ഥലം: ഇന്ത്യൻ കൾചറൽ സെന്റർ (ഐ.സി.സി), മാമൂറ, അബുഹമൂർ, ദോഹ.
പാസ്‌പോർട്ട് പുതുക്കൽ ഉൾപ്പെടെയുള്ള കോൺസുലാർ സേവനങ്ങളുമായി ബന്ധപ്പെട്ട അപേക്ഷാ നടപടികൾക്ക് ഐ.സി.സിയുടെ സഹായം തേടാമെന്ന് അധികൃതർ അറിയിച്ചു.
