Dubai Expat Death: സ്തനാർബുദത്തോട് പോരാടുന്നതിനിടെ ദുബായിൽ 33കാരിയായ ഇന്ത്യൻ പ്രവാസി യുവതി മരിച്ചു. കർണാടക സ്വദേശിനിയായ പ്രവിത ഡെൽവിൻ പിന്റോയാണ് ചികിത്സയ്ക്കിടെ ഉണ്ടായ ആരോഗ്യപ്രശ്നങ്ങളെ തുടർന്ന് മരിച്ചത്. നവംബർ 2 തിങ്കളാഴ്ചയായിരുന്നു അന്ത്യം. ദുബായിലെ ആശുപത്രിയിൽ എട്ട് വർഷമായി ജോലി ചെയ്തിരുന്ന പ്രവിതയുടെ വിയോഗം കുടുംബത്തെയും സുഹൃത്തുക്കളെയും ദുഃഖത്തിലാഴ്ത്തി.
അണുബാധയും കടുത്ത പനിയും; നില വഷളായി
നാല് മുതൽ അഞ്ച് മാസം മുമ്പാണ് പ്രവിതയ്ക്ക് സ്തനാർബുദം സ്ഥിരീകരിച്ചതെന്ന് കുടുംബസുഹൃത്ത് പറഞ്ഞു. തുടർന്ന് കീമോതെറാപ്പി ചികിത്സയിലായിരുന്നു യുവതി. ഇതിനിടെയാണ് കടുത്ത പനിയും നെഞ്ചിലെ അണുബാധയും ഉണ്ടായത്.
ആദ്യഘട്ടത്തിൽ ആശുപത്രിയിൽ പ്രവേശിപ്പിച്ചപ്പോൾ പനിയും അണുബാധയും കുറഞ്ഞിരുന്നു. എന്നാൽ ഞായറാഴ്ച വീണ്ടും പനി അനുഭവപ്പെട്ടതിനെ തുടർന്ന് ആശുപത്രിയിൽ പ്രവേശിപ്പിച്ചു. പിന്നീട് തീവ്രപരിചരണ വിഭാഗത്തിലേക്ക് മാറ്റി.
ശ്വാസതടസ്സം അനുഭവപ്പെട്ടതിനെ തുടർന്ന് ആരോഗ്യനില ഗുരുതരമാവുകയും ഒടുവിൽ മരണം സംഭവിക്കുകയുമായിരുന്നു. കീമോതെറാപ്പിയെ തുടർന്ന് പ്രതിരോധശേഷി കുറഞ്ഞത് ആരോഗ്യനില വഷളാകാൻ കാരണമായിരിക്കാമെന്നാണ് കുടുംബസുഹൃത്തിന്റെ വിശദീകരണം.
രണ്ട് പിഞ്ചുകുഞ്ഞുങ്ങളെ തനിച്ചാക്കി
രണ്ട് പെൺമക്കളും ഭർത്താവുമാണ് പ്രവിതയ്ക്ക് ദുബായിലുള്ളത്. 32 മാസവും 14 മാസവും മാത്രം പ്രായമുള്ള കുഞ്ഞുങ്ങളെ തനിച്ചാക്കിയാണ് യുവതി വിടപറഞ്ഞത്. കുടുംബത്തെ തളർത്തിയിരിക്കുകയാണ് പ്രവിതയുടെ അപ്രതീക്ഷിത വിയോഗം.
ദുബായിലെ ഒരു ആശുപത്രിയിൽ എട്ട് വർഷമായി പ്രവർത്തിച്ചുവരികയായിരുന്നു പ്രവിത. ജോലിയോടുള്ള ആത്മാർഥതയ്ക്കും സഹപ്രവർത്തകരോടും രോഗികളോടും സ്നേഹപൂർവം ഇടപെടുന്ന സ്വഭാവത്തിനും അവർ അറിയപ്പെട്ടിരുന്നുവെന്ന് സുഹൃത്തുക്കൾ അനുസ്മരിച്ചു. എപ്പോഴും പുഞ്ചിരിയോടെ കാണപ്പെട്ടിരുന്ന വ്യക്തിയായിരുന്നു പ്രവിതയെന്നും അവർ പറഞ്ഞു.
മൃതശരീരം ഇന്ത്യയിലേക്ക് കൊണ്ടുപോകുന്നതിനുള്ള നടപടികൾ പുരോഗമിക്കുകയാണ്. ദുബായിൽ താമസിക്കുന്ന ബന്ധുക്കളിൽ ഭൂരിഭാഗവും സംസ്കാരച്ചടങ്ങുകളിൽ പങ്കെടുക്കുന്നതിനായി മംഗളൂരുവിലേക്ക് പോകുമെന്നാണ് റിപ്പോർട്ട്.
കുടുംബത്തിന്റെ സ്വകാര്യത മാനിക്കണമെന്നും പ്രവിതയുടെ ചിത്രം പ്രസിദ്ധീകരിക്കരുതെന്നും ബന്ധുക്കൾ അഭ്യർഥിച്ചിട്ടുണ്ട്.
