Qatar Boat Show 2026 Kicks Off Today ദോഹ: ആഡംബര യോട്ടുകളുടെയും സമുദ്ര വിനോദസഞ്ചാരത്തിന്റെയും ലോകത്തെ വിസ്മയക്കാഴ്ചകളുമായി ഖത്തർ ബോട്ട് ഷോ 2026ന് ഇന്ന് (നവംബർ 4) ദോഹയിലെ ഓൾഡ് ദോഹ പോർട്ടിൽ തുടക്കമാകും. നവംബർ 7 വരെ നീളുന്ന പ്രദർശനത്തിൽ പ്രമുഖ അന്താരാഷ്ട്ര യാട്ട് നിർമാതാക്കളും മറൈൻ സാങ്കേതികവിദ്യാ കമ്പനികളും പങ്കെടുക്കും.
പുതിയ ആഡംബര യോട്ടുകളുടെ അവതരണം, മറൈൻ സാങ്കേതികവിദ്യയിലെ നൂതന സംവിധാനങ്ങൾ, ആഡംബര ബോട്ടുകൾ, സമുദ്ര വിനോദസഞ്ചാരവുമായി ബന്ധപ്പെട്ട സേവനങ്ങൾ എന്നിവയാണ് മേളയിലെ പ്രധാന ആകർഷണങ്ങൾ.
അൽ ഷാലി മറൈൻ അവതരിപ്പിക്കുന്ന ASMARATY G77 ഖത്തറിൽ ആദ്യമായി പ്രദർശിപ്പിക്കും. ഗൾഫ് ക്രാഫ്റ്റിന്റെ മജസ്റ്റി, നോമാഡ് യാട്ട്സ്, ഒറിക്സ് ക്രൂയിസേഴ്സ്, സിൽവർകാറ്റ് തുടങ്ങിയ ബ്രാൻഡുകളും പ്രദർശനത്തിൽ സാന്നിധ്യമറിയിക്കും. ബെനെറ്റിയുടെ പുതിയ യാട്ട് പദ്ധതികളും ശ്രദ്ധേയമാകും.
മേളയുടെ ഉദ്ഘാടന ദിനമായ ഇന്ന് രാത്രി 7.30ന് വെടിക്കെട്ടും പൈറോ-ഡ്രോൺ ഷോയും നടക്കും. രാത്രി 7.45ന് ദോഹ ഫിലിം ഇൻസ്റ്റിറ്റ്യൂട്ടിന്റെ സഹകരണത്തോടെ ‘സോങ് ഓഫ് ദ സീ’ എന്ന സിനിമയുടെ പ്രദർശനവും ഉണ്ടായിരിക്കും. കുട്ടികൾക്കായുള്ള മത്സ്യബന്ധന പരിപാടികൾ, സംഗീത പരിപാടികൾ, സിനിമാ പ്രദർശനങ്ങൾ എന്നിവയും ഒരുക്കിയിട്ടുണ്ട്.
നവംബർ 4ന് വൈകിട്ട് 4 മുതൽ രാത്രി 9 വരെയും നവംബർ 5, 6 തീയതികളിൽ വൈകിട്ട് 4 മുതൽ രാത്രി 10 വരെയും നവംബർ 7ന് വൈകിട്ട് 4 മുതൽ രാത്രി 9 വരെയുമാണ് പ്രദർശനം. ജനറൽ അഡ്മിഷൻ ടിക്കറ്റ് നിരക്ക് 50 ഖത്തർ റിയാലാണ്. നാല് ദിവസത്തേക്കുള്ള ടിക്കറ്റിന് 160 റിയാലും ഹോസ്പിറ്റാലിറ്റി പാസിന് പ്രതിദിനം 450 റിയാലുമാണ് നിരക്ക്.
ആഗോള ആഡംബര യാട്ട് വ്യവസായത്തിൽ ഖത്തറിന്റെ സാന്നിധ്യം ശക്തിപ്പെടുത്തുന്നതിനും മറൈൻ ടൂറിസം മേഖലയിലെ നിക്ഷേപ-വാണിജ്യ സാധ്യതകൾ പരിചയപ്പെടുത്തുന്നതിനും ബോട്ട് ഷോ സഹായകമാകുമെന്നാണ് പ്രതീക്ഷിക്കുന്നത്.
