ദുബായ്: യുഎഇയിലുടനീളമുള്ള ഇന്ത്യൻ പ്രവാസി കുടുംബങ്ങൾ ദീപാവലി ആഘോഷത്തിനായി ഒരുങ്ങി. ഇത്തവണ വാരാന്ത്യത്തിലാണ് ദീപാവലി എത്തുന്നത് എന്നതിനാൽ ശനിയാഴ്ചയും ഞായറാഴ്ചയും നീളുന്ന ആഘോഷപരിപാടികളാണ് പല കുടുംബങ്ങളും ആസൂത്രണം ചെയ്തിരിക്കുന്നത്. സ്വർണം, വെള്ളി, പുതിയ പാത്രങ്ങൾ എന്നിവ വാങ്ങുന്നത് ശുഭകരമായി കണക്കാക്കുന്ന ധന്തേരസോടെയാണ് വെള്ളിയാഴ്ച ആഘോഷങ്ങൾക്ക് തുടക്കമായത്.
ദുബായിലെ അധ്യാപികയായ ഗഗൻ ദീപ് ധൻജലിനെ സംബന്ധിച്ചിടത്തോളം ധന്തേരസ് ആഘോഷം ബർ ദുബായിലേക്കുള്ള യാത്രയായിരുന്നു. സ്വർണം വാങ്ങുന്നത് ശുഭകരമായി കരുതുന്നതിനാൽ വൈകിട്ട് 5.30ഓടെയാണ് കുടുംബം ജ്വല്ലറി കടകളിലേക്ക് പോയത്. എന്നാൽ മീന ബസാറിലെ ജ്വല്ലറികളിൽ വലിയ തിരക്കായിരുന്നു അനുഭവപ്പെട്ടത്. പാർക്കിങ് സ്ഥലങ്ങളെല്ലാം നിറഞ്ഞിരുന്നുവെന്നും അവർ പറഞ്ഞു.
തിരക്ക് ഒഴിവാക്കാൻ നേരത്തെ തന്നെ ഒരു കസ്റ്റം മെയ്ഡ് പെൻഡന്റ് ഓർഡർ ചെയ്തിരുന്നു. അത് വാങ്ങാനായിരുന്നു യാത്ര. ഏകദേശം ഒന്നര മണിക്കൂറിനുള്ളിൽ സാധനങ്ങൾ വാങ്ങി മടങ്ങാൻ കഴിഞ്ഞതായും ഗഗൻ ദീപ് വ്യക്തമാക്കി.
ദീപാവലി വാരാന്ത്യത്തിൽ കുടുംബത്തോടൊപ്പം കൂടുതൽ സമയം ചെലവഴിക്കാനാകുന്നതിന്റെ സന്തോഷത്തിലാണ് മകൾ ജനീഷ. ബന്ദി ചോർ ദിവസ് ആഘോഷത്തിന്റെ ഭാഗമായി പകൽ കുടുംബം ഗുരുദ്വാര സന്ദർശിക്കും. തുടർന്ന് വീട്ടിലെത്തി വിളക്കുകൾ തെളിയിക്കും.
അതിഥികളെ സ്വീകരിക്കുന്നതിലും കുടുംബം ഇത്തവണ മാറ്റം വരുത്തിയിട്ടുണ്ട്. ദീപാവലി വാരാന്ത്യത്തിലെ തിരക്ക് ഒഴിവാക്കാൻ കഴിഞ്ഞ വാരാന്ത്യത്തിൽ തന്നെ സുഹൃത്തുക്കളെയും ബന്ധുക്കളെയും വീട്ടിലേക്ക് ക്ഷണിച്ചിരുന്നു. ദീപാവലി ദിവസം വിളക്കുകൾ തെളിയിച്ചും ഇൻഡോർ ഗെയിമുകൾ കളിച്ചും കുടുംബത്തോടൊപ്പം ശാന്തമായ വൈകുന്നേരം ചെലവഴിക്കാനാണ് തീരുമാനം.
സ്വർണത്തിന് പകരം വെള്ളി നാണയം
സ്വർണവില ഉയർന്ന സാഹചര്യത്തിൽ ഇത്തവണ വെള്ളി നാണയം വാങ്ങാനാണ് ഇന്ത്യൻ പ്രവാസിയായ അരിജിത് നന്ദി തീരുമാനിച്ചത്. സമ്പത്തിന്റെയും സമൃദ്ധിയുടെയും പ്രതീകമായി എല്ലാ വർഷവും ധന്തേരസിന് ഒരു നാണയം വാങ്ങാറുണ്ടെന്നും അദ്ദേഹം പറഞ്ഞു.
വീടുകൾ ദീപങ്ങളാലും വർണാഭമായ ലൈറ്റുകളാലും അലങ്കരിക്കാനുള്ള ഒരുക്കങ്ങളും കുടുംബങ്ങൾ ആരംഭിച്ചു. മകന്റെ നിർബന്ധത്തെത്തുടർന്ന് വെള്ളിയാഴ്ച തന്നെ കുടുംബം അലങ്കാര ലൈറ്റുകൾ വാങ്ങി.
വാരാന്ത്യത്തിൽ സുഹൃത്തുക്കളുടെ വീടുകളിലെ സന്ദർശനവും ആഘോഷങ്ങളുടെ ഭാഗമാണ്. പരമ്പരാഗത വസ്ത്രങ്ങൾ ധരിച്ച് മധുരപലഹാരങ്ങളും സമ്മാനങ്ങളുമായി പരസ്പരം വീടുകൾ സന്ദർശിക്കാറുണ്ടെന്ന് അരിജിത് പറഞ്ഞു.
ദീപാവലി ദിനമായ ഞായറാഴ്ച വീട്ടിൽ കൂടുതൽ പരമ്പരാഗതമായ ആഘോഷങ്ങളാണ് ഒരുക്കുന്നത്. പ്രവേശന കവാടത്തിൽ ഭാര്യയും മകനും ചേർന്ന് പൂക്കളോ നിറപ്പൊടികളോ ഉപയോഗിച്ച് രംഗോലി ഒരുക്കും. വാതിലുകൾ തോരണംകൊണ്ട് അലങ്കരിക്കും. വൈകുന്നേരം മുറ്റത്ത് മൺവിളക്കുകളും മെഴുകുതിരികളും തെളിയിച്ച് അയൽക്കാരെയും സുഹൃത്തുക്കളെയും സ്വീകരിക്കും.
പ്രതിസന്ധികളിലും പ്രതീക്ഷയുടെ വെളിച്ചം
ദുബായിൽ താമസിക്കുന്ന എഴുത്തുകാരി റുച്ച ദാര്യയെ സംബന്ധിച്ചിടത്തോളം ദീപാവലിക്ക് പ്രത്യേകമായൊരു വൈകാരിക അർഥമുണ്ട്. പക്ഷാഘാതത്തെ തുടർന്ന് ചികിത്സയും രോഗമുക്തിയും നേടിയ കുടുംബത്തിന്റെ അനുഭവങ്ങളിൽനിന്ന് പ്രചോദനം ഉൾക്കൊണ്ടാണ് അവർ ‘ദി ലൈറ്റ് നെവർ ലെഫ്റ്റ്’ എന്ന കുട്ടികളുടെ ചിത്രപുസ്തകം എഴുതിയത്.
വീട്ടിൽ പൂജയും ദീപാലങ്കാരവും ഒരുക്കി കുടുംബത്തോടൊപ്പം ആഘോഷിക്കാനാണ് അവരുടെ പദ്ധതി. ബന്ധുക്കളെയും സുഹൃത്തുക്കളെയും സന്ദർശിച്ച് മധുരപലഹാരങ്ങളും ചോക്ലേറ്റുകളും കൈമാറും.
ആരോഗ്യപ്രശ്നങ്ങൾക്ക് മുമ്പ് കുട്ടികൾക്കൊപ്പം രംഗോലി ഒരുക്കിയിരുന്നതായി റുച്ച പറഞ്ഞു. ഇപ്പോൾ മകളും മകനും സ്വന്തമായി രംഗോലി തയ്യാറാക്കുന്നുണ്ട്. ഇന്ത്യക്കാരല്ലാത്ത സുഹൃത്തുക്കളുമായും ദീപാവലി ആഘോഷങ്ങൾ പങ്കുവയ്ക്കാറുണ്ട്. കുട്ടികൾ സുഹൃത്തുക്കൾക്ക് ചോക്ലേറ്റുകളും മെഴുകുതിരികളും സമ്മാനമായി നൽകും.
പ്രതിസന്ധികൾക്കിടയിലും പ്രതീക്ഷ കണ്ടെത്തുന്നതിനെക്കുറിച്ചാണ് തന്റെ പുസ്തകം സംസാരിക്കുന്നതെന്ന് റുച്ച വ്യക്തമാക്കി. ഇരുട്ടിനെ ഭയപ്പെടുന്നതിൽ തെറ്റില്ലെന്നും എന്നാൽ ഓരോ ചുവടായി മുന്നോട്ടുപോയാൽ പ്രതീക്ഷയുടെ വെളിച്ചം കണ്ടെത്താനാകുമെന്നും പുസ്തകം ഓർമിപ്പിക്കുന്നു.
ദീപാവലി ആഘോഷിക്കാൻ കഴിയാത്ത സാഹചര്യങ്ങളിലൂടെ കടന്നുപോകുന്ന കുടുംബങ്ങൾക്കും പ്രതീക്ഷ നൽകുന്നതാണ് ഈ സന്ദേശമെന്നും അവർ കൂട്ടിച്ചേർത്തു. ഇത്തവണയും കുടുംബത്തോടും സുഹൃത്തുക്കളോടും ഒപ്പം സന്തോഷവും സ്നേഹവും പങ്കുവെച്ച് ദീപാവലി ആഘോഷിക്കാനുള്ള ഒരുക്കത്തിലാണ് യുഎഇയിലെ ഇന്ത്യൻ പ്രവാസികൾ.
