UAE Ramadan Clothing Shopping:റാസൽഖൈമ: റമദാൻ മാസത്തിന് ഇനിയും മാസങ്ങൾ ബാക്കിനിൽക്കെ യുഎഇയിലെ പരമ്പരാഗത വസ്ത്രവിപണികളിൽ ഷോപ്പിങ് സജീവമാകുന്നു. അവസാന നിമിഷത്തെ തിരക്കും തുന്നൽക്കടകളിലെ തിരക്കുമൊഴിവാക്കി ഇഷ്ടപ്പെട്ട വസ്ത്രങ്ങൾ സ്വന്തമാക്കാൻ നിരവധി കുടുംബങ്ങളാണ് ഇപ്പോഴേ തുണിത്തരങ്ങൾ വാങ്ങിത്തുടങ്ങിയത്. റമദാനിനും ഈദുൽ ഫിത്തറിനും ആവശ്യമായ വസ്ത്രങ്ങൾ നേരത്തേ തയ്യാറാക്കാനുള്ള തിരക്കിലാണ് പലരും.

റാസൽഖൈമയിലെ പരമ്പരാഗത വിപണികളിലാണ് നേരത്തെയുള്ള ഷോപ്പിങ് കൂടുതൽ ശ്രദ്ധ നേടുന്നത്. ചില ഉപഭോക്താക്കൾ സെപ്റ്റംബർ മുതൽ തന്നെ തുണിത്തരങ്ങൾ വാങ്ങിത്തുടങ്ങിയതായി വ്യാപാരികൾ പറയുന്നു. നവംബർ, ഡിസംബർ, ജനുവരി മാസങ്ങളിലും വിൽപ്പന തുടരുമെന്നാണ് വ്യാപാരികളുടെ പ്രതീക്ഷ.

ജാക്കാർഡ് മുതൽ സിൽക്ക് വരെ; ഇഷ്ട തുണികൾക്ക് ആവശ്യക്കാർ

റമദാനിനും ഈദിനുമായി വസ്ത്രങ്ങൾ തയ്ക്കാൻ ജാക്കാർഡ്, സിൽക്ക്, കോട്ടൺ, ഇറ്റാലിയൻ തുണിത്തരങ്ങൾക്കാണ് ആവശ്യക്കാർ കൂടുതലെന്ന് വ്യാപാരികൾ പറയുന്നു. അമ്മയ്ക്കും മകൾക്കും ഒരേ ഡിസൈനിലുള്ള വസ്ത്രങ്ങൾ തയ്യാറാക്കാൻ ചില കുടുംബങ്ങൾ വലിയ അളവിൽ തുണികൾ വാങ്ങുന്നുണ്ട്. പത്ത് മുതൽ 17 യാർഡ് വരെ ഒരുമിച്ച് വാങ്ങുന്നവരുമുണ്ടെന്ന് വ്യാപാരികൾ വ്യക്തമാക്കി.

തയ്യൽക്കടകളിൽ പിന്നീട് തിരക്ക് കൂടുന്നതിനാൽ നേരത്തേ തുണി വാങ്ങി നൽകുന്നതാണ് പലരുടെയും രീതി. ഇഷ്ടപ്പെട്ട നിറവും ഡിസൈനും തിരഞ്ഞെടുക്കാനും വസ്ത്രങ്ങൾ കൃത്യസമയത്ത് തയാറാക്കാനും ഇത് സഹായിക്കുന്നു.

നാലു മുതൽ ആറു മാസം മുമ്പേ ഒരുക്കങ്ങൾ

ഷാർജയിൽ താമസിക്കുന്ന മറിയം റമദാൻ ഷോപ്പിങ്ങിനുള്ള ഒരുക്കങ്ങൾ നാലു മുതൽ ആറു മാസം മുമ്പേ ആരംഭിക്കാറുണ്ടെന്ന് പറയുന്നു. നേരത്തേ വാങ്ങുമ്പോൾ വിലയിൽ കൂടുതൽ വിലപേശാനും ഇഷ്ടപ്പെട്ട ഡിസൈനുകൾ തിരഞ്ഞെടുക്കാനും തയ്യൽ ജോലികൾ സമ്മർദമില്ലാതെ പൂർത്തിയാക്കാനും സാധിക്കുമെന്ന് അവർ വ്യക്തമാക്കി.

ഇന്ത്യ, ഇറ്റലി, യുകെ തുടങ്ങിയ രാജ്യങ്ങളിൽനിന്നുള്ള തുണിത്തരങ്ങൾ തിരഞ്ഞെടുക്കാറുള്ള മറിയം, യുഎഇയിലെ വിപണികളിൽനിന്നും ആവശ്യമായ വസ്ത്രങ്ങൾ വാങ്ങുന്നുണ്ട്. ഗുണനിലവാരത്തിനാണ് കൂടുതൽ പ്രാധാന്യം നൽകുന്നതെന്നും വസ്ത്രങ്ങളുടെ എണ്ണത്തേക്കാൾ അവയുടെ നിലവാരമാണ് പ്രധാനമെന്നും അവർ പറഞ്ഞു.

ഷോപ്പിങ് രീതികളിലും മാറ്റം

മുൻകാലങ്ങളിൽ റമദാനിനും ഈദിനും ആവശ്യമായ തുണിത്തരങ്ങൾ ഒറ്റത്തവണയായി വലിയ അളവിൽ വാങ്ങിയിരുന്നവർ ഇപ്പോൾ പല ഘട്ടങ്ങളിലായി ചെറിയ അളവിൽ വാങ്ങുന്ന രീതിയിലേക്ക് മാറിയതായി വ്യാപാരികൾ പറയുന്നു. പുതിയ ഡിസൈനുകളും ഫാഷൻ ട്രെൻഡുകളും പരിഗണിച്ചാണ് പലരും വാങ്ങൽ നീട്ടുന്നത്.

പുതിയ തുണിശേഖരങ്ങൾ ഓരോ ആഴ്ചയും വിപണിയിലെത്തിക്കുന്ന കടകളുമുണ്ട്. വാട്സ്ആപ്പ് സ്റ്റാറ്റസിലൂടെ പുതിയ ഡിസൈനുകളുടെ ചിത്രങ്ങൾ പങ്കുവെച്ച് ഉപഭോക്താക്കളെ ആകർഷിക്കുന്നതും വ്യാപാരത്തിന്റെ ഭാഗമായിട്ടുണ്ട്.

ചിലർക്ക് റമദാൻ ഷോപ്പിങ് അവസാന നിമിഷം മതി

എന്നാൽ എല്ലാ ഉപഭോക്താക്കളും നേരത്തേ ഷോപ്പിങ് ആരംഭിക്കുന്നില്ല. റാസൽഖൈമയിലെ ഓൾഡ് മാർക്കറ്റിലുള്ള ചില വസ്ത്രശാലകളിൽ ഇപ്പോൾ യുഎഇ ദേശീയദിനത്തിനായുള്ള വസ്ത്രങ്ങൾക്കാണ് ആവശ്യക്കാർ കൂടുതലെന്ന് വ്യാപാരികൾ പറയുന്നു. റമദാൻ വസ്ത്രങ്ങൾ വാങ്ങാൻ പലരും മാസത്തിന്റെ തുടക്കത്തോടടുത്താണ് എത്തുന്നത്.

ജലാബിയകൾ, എംബ്രോയ്ഡറി ചെയ്ത പരമ്പരാഗത വസ്ത്രങ്ങൾ, അമ്മയ്ക്കും മകൾക്കും ഒരേ ഡിസൈനിലുള്ള വസ്ത്രങ്ങൾ എന്നിവയ്ക്കാണ് ആവശ്യക്കാർ. ദുബായ്, അബുദാബി, അൽ ഐൻ തുടങ്ങിയ സ്ഥലങ്ങളിൽനിന്നും വാരാന്ത്യങ്ങളിൽ ഉപഭോക്താക്കൾ റാസൽഖൈമയിലെ പഴയ വിപണികളിൽ എത്തുന്നുണ്ട്.

റമദാനും ഈദും മുന്നിൽക്കണ്ട് ചിലർ ഇപ്പോഴേ ഒരുക്കങ്ങൾ ആരംഭിക്കുമ്പോൾ മറ്റുചിലർ അവസാന നിമിഷം വരെ കാത്തിരിക്കുകയാണ്. എങ്കിലും യുഎഇയിലെ പരമ്പരാഗത വസ്ത്രവിപണികളിൽ വിശുദ്ധ മാസത്തിനായുള്ള ഒരുക്കങ്ങൾ പതുക്കെ സജീവമാകുകയാണ്.

യുഎഇയിലെ വാർത്തകളും പുതിയ തൊഴിലവസരങ്ങൾ അറിയാൻ ചാനൽ ഇപ്പോൾ തന്നെ ഫോളോ ചെയ്യൂ