കുവൈത്തിൽ അഭിഭാഷകർ സാമൂഹിക മാധ്യമങ്ങളും പരമ്പരാഗത മാധ്യമങ്ങളും ഉപയോഗിക്കുമ്പോൾ പ്രൊഫഷണൽ പെരുമാറ്റച്ചട്ടങ്ങളും നിയമമേഖലയുടെ ധാർമിക മൂല്യങ്ങളും കർശനമായി പാലിക്കണമെന്ന് കുവൈത്ത് ലോയേഴ്‌സ് അസോസിയേഷൻ മുന്നറിയിപ്പ് നൽകി.
പൊതുവേദികളിലും ഓൺലൈൻ പ്ലാറ്റ്‌ഫോമുകളിലും അഭിഭാഷകർ ഇടപെടുമ്പോൾ നിയമവൃത്തിയുടെ അന്തസ്സും പദവിയും വിശ്വാസ്യതയും സംരക്ഷിക്കേണ്ടത് അനിവാര്യമാണെന്ന് അസോസിയേഷൻ വ്യക്തമാക്കി.
പ്രത്യേകിച്ച്, ടിക് ടോക്കിൽ ലൈവ് സ്ട്രീമിങ് നടത്തി സ്വയം പ്രദർശിപ്പിക്കുന്നതിനോ പരസ്യപ്രചാരണം നടത്തുന്നതിനോ ക്ലയന്റുകളെ ആകർഷിക്കുന്നതിനോ ശ്രമിക്കരുതെന്ന് അഭിഭാഷകരോട് നിർദേശിച്ചു. ഇത്തരം പ്രവർത്തനങ്ങൾ പ്രൊഫഷണൽ ചട്ടങ്ങൾക്കും ധാർമിക മാനദണ്ഡങ്ങൾക്കും വിരുദ്ധമാകരുതെന്നും മുന്നറിയിപ്പിൽ പറയുന്നു.
അതേസമയം, നിയമങ്ങളെക്കുറിച്ച് പൊതുജനങ്ങളിൽ അവബോധം വളർത്തുന്ന വിദ്യാഭ്യാസപരവും വിജ്ഞാനപ്രദവുമായ ഉള്ളടക്കങ്ങൾ പങ്കുവയ്ക്കുന്നതിനെ അസോസിയേഷൻ പിന്തുണച്ചു. എന്നാൽ ഇത്തരം വിവരങ്ങൾ നിയമവൃത്തിയുടെ അന്തസ്സിന് അനുയോജ്യമായ രീതിയിൽ അവതരിപ്പിക്കണമെന്നും നിർദേശിച്ചു.
പ്രൊഫഷണൽ ചട്ടങ്ങൾ ലംഘിക്കുന്നവരെ നിരീക്ഷിക്കുന്നത് തുടരുമെന്നും നിയമലംഘനം തെളിയിക്കപ്പെട്ടാൽ ബന്ധപ്പെട്ടവർക്കെതിരെ നിയമപരവും അച്ചടക്കപരവുമായ നടപടികൾ സ്വീകരിക്കുമെന്നും അസോസിയേഷൻ അറിയിച്ചു. ഇക്കാര്യത്തിൽ ആരോടും പ്രത്യേക പരിഗണനയോ ഇളവോ ഉണ്ടാകില്ലെന്നും വ്യക്തമാക്കി.
നിയമവൃത്തിയുടെ അന്തസ്സും വിശ്വാസ്യതയും സംരക്ഷിക്കുന്നതിനും അഭിഭാഷകരിലുള്ള പൊതുജനവിശ്വാസം നിലനിർത്തുന്നതിനുമാണ് നടപടികളെന്നും അസോസിയേഷൻ കൂട്ടിച്ചേർത്തു.
