
റോഡുകളിലെ സുരക്ഷ ഉറപ്പാക്കുന്നതിനും അപകടങ്ങൾ കുറയ്ക്കുന്നതിനും ട്രാഫിക് ലെയ്ൻ നിയമങ്ങളും റോഡ് മാർക്കിങ്ങുകളും കൃത്യമായി പാലിക്കണമെന്ന് മന്ത്രാലയത്തിന്റെ മുന്നറിയിപ്പ്. ട്രാഫിക് ബോധവൽക്കരണ സന്ദേശത്തിലൂടെയാണ് വാഹനമോടിക്കുന്നവർക്ക് നിർദേശങ്ങൾ നൽകിയത്.
ലെയ്ൻ മാറുമ്പോൾ നിരോധിച്ചിരിക്കുന്ന റോഡ് മാർക്കിങ്ങുകൾ മറികടക്കാൻ പാടില്ല. ലെയ്ൻ മാറ്റാൻ അനുമതിയുള്ള സ്ഥലങ്ങളിൽ മാത്രമേ വാഹനങ്ങൾ മറ്റൊരു ലെയ്നിലേക്ക് പ്രവേശിക്കാവൂ. ഇതിനുമുമ്പ് ആ ലെയ്നിൽ മറ്റ് വാഹനങ്ങളില്ലെന്ന് ഉറപ്പാക്കുകയും ഇൻഡിക്കേറ്റർ ഉപയോഗിക്കുകയും വേണം. മറ്റ് വാഹനങ്ങളുമായി സുരക്ഷിതമായ അകലം പാലിക്കണമെന്നും നിർദേശമുണ്ട്.
യാത്ര ചെയ്യേണ്ട ദിശയ്ക്ക് അനുയോജ്യമായ ലെയ്ൻ നേരത്തേ തന്നെ തിരഞ്ഞെടുക്കണം. പെട്ടെന്നുള്ള ലെയ്ൻ മാറ്റങ്ങളും അപ്രതീക്ഷിതമായ വാഹന നീക്കങ്ങളും ഒഴിവാക്കണം. ഇത്തരം പ്രവൃത്തികൾ മറ്റ് വാഹനയാത്രക്കാരുടെ സുരക്ഷയ്ക്ക് ഭീഷണിയാകുമെന്ന് മന്ത്രാലയം ഓർമിപ്പിച്ചു.
ജങ്ഷനുകൾ, യു-ടേൺ പോയിന്റുകൾ, റോഡിൽ നിന്ന് പുറത്തേക്കുള്ള എക്സിറ്റ് എന്നിവിടങ്ങളിൽ എത്തുന്നതിന് മുമ്പ് തന്നെ ശരിയായ ലെയ്ൻ തിരഞ്ഞെടുക്കണം. യു-ടേൺ പോയിന്റുകളിലും എക്സിറ്റുകളിലും വാഹനങ്ങൾ ക്യൂ പാലിച്ച് മുന്നോട്ട് പോകണം. കാത്തുനിൽക്കുന്ന വാഹനങ്ങളെ മറികടക്കുകയോ ക്യൂവിൽ ഇടിച്ചുകയറി മുന്നിൽ പ്രവേശിക്കുകയോ ചെയ്യരുത്.
അനുവദിച്ചിട്ടുള്ള സ്ഥലങ്ങളിൽ മാത്രമേ ഓവർടേക്ക് ചെയ്യാൻ പാടുള്ളൂ. ഓവർടേക്ക് ചെയ്യുന്നതിന് മുമ്പ് റോഡ് സുരക്ഷിതമാണെന്നും മറ്റ് വാഹനങ്ങൾക്ക് തടസ്സമുണ്ടാകില്ലെന്നും ഉറപ്പാക്കണം. ഈ സമയത്തും ഇൻഡിക്കേറ്റർ നിർബന്ധമായും ഉപയോഗിക്കണം.
ട്രാഫിക് ലെയ്ൻ നിയമങ്ങളും റോഡ് മാർക്കിങ്ങുകളും പാലിക്കുന്നത് ഓരോ വാഹനയാത്രക്കാരന്റെയും ഉത്തരവാദിത്തമാണെന്ന് മന്ത്രാലയം വ്യക്തമാക്കി. നിയമങ്ങൾ കൃത്യമായി പാലിക്കുന്നത് റോഡപകടങ്ങൾ കുറയ്ക്കാനും മനുഷ്യജീവനും സ്വത്തിനും സംരക്ഷണം നൽകാനും സഹായിക്കും.
ഡ്രൈവർമാരുടെയും മറ്റ് റോഡ് ഉപയോക്താക്കളുടെയും സുരക്ഷ ഉറപ്പാക്കാൻ ട്രാഫിക് നിയമങ്ങൾ പാലിക്കണമെന്നും മന്ത്രാലയം വീണ്ടും ഓർമിപ്പിച്ചു.





