
Kuwait Warns Drivers കുവൈത്ത് സിറ്റി: കുവൈത്തിൽ ഇടത്തോട്ട് തിരിയാൻ അനുവദിച്ചിട്ടില്ലാത്ത ലെയിനിൽനിന്ന് തിരിയുന്ന വാഹനമോടിക്കുന്നവർക്ക് 50 കുവൈത്ത് ദിനാർ പിഴ ചുമത്തുമെന്ന് ആഭ്യന്തര മന്ത്രാലയത്തിന്റെ മുന്നറിയിപ്പ്. ഗതാഗത നിയമലംഘനം ആർട്ടിഫിഷ്യൽ ഇന്റലിജൻസ് (AI) ക്യാമറകളും ട്രാഫിക് നിരീക്ഷണ ക്യാമറകളും ഉപയോഗിച്ച് കണ്ടെത്തുമെന്ന് ജനറൽ ട്രാഫിക് ഡിപ്പാർട്ട്മെന്റ് അറിയിച്ചു.
ഇടത്തോട്ട് തിരിയാൻ ഉദ്ദേശിക്കുന്ന ഡ്രൈവർമാർ ജങ്ഷനിൽ എത്തുന്നതിന് മുമ്പ് അതിനായി നിശ്ചയിച്ചിട്ടുള്ള ലെയിനിലേക്ക് മാറണം. റോഡിലെ ദിശാസൂചക അമ്പടയാളങ്ങളും ലെയിൻ മാർക്കിങ്ങുകളും കൃത്യമായി പാലിക്കണമെന്നും അധികൃതർ നിർദേശിച്ചു.
നിയമലംഘനം കണ്ടെത്തിയാൽ ഒത്തുതീർപ്പ് പിഴയായി 50 ദിനാർ അടയ്ക്കണം. കേസ് കോടതിയിലെത്തുകയും ഡ്രൈവർ കുറ്റക്കാരനാണെന്ന് കണ്ടെത്തുകയും ചെയ്താൽ രണ്ട് മാസം വരെ തടവോ 100 മുതൽ 200 ദിനാർ വരെ പിഴയോ അല്ലെങ്കിൽ ഇവയിൽ ഏതെങ്കിലും ഒന്നോ ശിക്ഷയായി ലഭിക്കാം.
റോഡിലെ ലെയിൻ നിയന്ത്രണങ്ങൾ പാലിക്കാതിരിക്കുന്നത് ഗതാഗത തടസ്സങ്ങൾക്കും അപകടസാധ്യതകൾക്കും കാരണമാകുമെന്ന് അധികൃതർ മുന്നറിയിപ്പ് നൽകി. ജങ്ഷനുകളിലും ട്രാഫിക് സിഗ്നലുകളിലും വാഹനമോടിക്കുമ്പോൾ അനുവദിച്ചിട്ടുള്ള ലെയിനുകൾ തന്നെ ഉപയോഗിക്കണമെന്നും മന്ത്രാലയം ആവശ്യപ്പെട്ടു.
ക്യാമറകളുടെ സഹായത്തോടെ നിയമലംഘനങ്ങൾ കണ്ടെത്തുന്ന സംവിധാനം ശക്തമാക്കുന്നതിന്റെ ഭാഗമായാണ് മുന്നറിയിപ്പ്. അവസാന നിമിഷം ലെയിൻ മാറി തിരിയുന്നതും അനുവദിക്കാത്ത ലെയിനിൽനിന്ന് ഇടത്തോട്ട് തിരിയുന്നതും ഒഴിവാക്കണമെന്ന് അധികൃതർ ഡ്രൈവർമാരോട് നിർദേശിച്ചു.





