
Recover Gold from Old Electronics ദുബായ്: ഉപയോഗശൂന്യമായ പഴയ മൊബൈൽ ഫോണുകളിലും കമ്പ്യൂട്ടറുകളിലും സർക്യൂട്ട് ബോർഡുകളിലും അടങ്ങിയിരിക്കുന്ന സ്വർണം വീണ്ടെടുക്കാൻ നൂതന സാങ്കേതികവിദ്യ വികസിപ്പിച്ച് ഖലീഫ സർവകലാശാലയിലെ ഗവേഷകസംഘം. പരിസ്ഥിതിക്ക് ദോഷകരമായ രാസവസ്തുക്കൾ ഒഴിവാക്കി ഇലക്ട്രോണിക് മാലിന്യത്തിൽനിന്ന് സ്വർണം വേർതിരിച്ചെടുക്കാൻ സഹായിക്കുന്ന പ്രത്യേക ഉപകരണമാണ് സംഘം വികസിപ്പിച്ചിരിക്കുന്നത്. ദുബായ് ഫ്യൂച്ചർ വീക്കിന്റെ ഭാഗമായി ലോകത്തിന്റെ വിവിധ ഭാഗങ്ങളിൽ നിന്നുള്ള സർവകലാശാല വിദ്യാർഥികളും യുവ ഗവേഷകരും അവതരിപ്പിച്ച നൂറോളം പദ്ധതികളിൽ ശ്രദ്ധേയമായ ഒന്നാണിത്.
ഒരു മണിക്കൂറിൽ 99 ശതമാനം സ്വർണം വീണ്ടെടുക്കാം
ഖലീഫ സർവകലാശാലയിലെ കെമിസ്ട്രി വിഭാഗത്തിലെ ലീഡ് ഗവേഷകയും സാങ്കേതികവിദ്യാ വികസന വിദഗ്ധയുമായ ഡോ. നജാത്ത് അൽദഖയുടെ നേതൃത്വത്തിലുള്ള സംഘമാണ് ഈ സാങ്കേതികവിദ്യ വികസിപ്പിച്ചത്. ഏകദേശം രണ്ട് വർഷത്തെ ഗവേഷണത്തിലൂടെയാണ് പദ്ധതി രൂപപ്പെടുത്തിയത്.
ഇലക്ട്രോണിക് മാലിന്യങ്ങൾ സംസ്കരിക്കുമ്പോൾ ലഭിക്കുന്ന ദ്രാവകത്തിൽനിന്ന് സ്വർണം മാത്രം തിരഞ്ഞുപിടിച്ച് ആഗിരണം ചെയ്യാൻ കഴിയുന്ന പ്രത്യേക സുഷിരഘടനയുള്ള 2D മെറ്റീരിയലാണ് ഇതിനായി ഉപയോഗിക്കുന്നത്. ഈ പ്രക്രിയ കൂടുതൽ വേഗത്തിലാക്കാൻ സഹായിക്കുന്ന ഉപകരണവും സംഘം വികസിപ്പിച്ചിട്ടുണ്ട്.
പരീക്ഷണങ്ങളിൽ ഒരു മണിക്കൂറിനുള്ളിൽ ദ്രാവകത്തിലുള്ള സ്വർണത്തിന്റെ 99 ശതമാനം വരെ വീണ്ടെടുക്കാൻ കഴിഞ്ഞതായി ഗവേഷകസംഘം അറിയിച്ചു. ഒരു മണിക്കൂറിൽ 5.2 ഗ്രാം സ്വർണം വീണ്ടെടുക്കാനായെന്നും ലഭിച്ച സ്വർണത്തിന്റെ ശുദ്ധി ഏകദേശം 21 കാരറ്റാണെന്നും ഡോ. നജാത്ത് വ്യക്തമാക്കി.
ഒരു ഗ്രാം സ്വർണം വീണ്ടെടുക്കാൻ ഒരു കിലോവാട്ട്-മണിക്കൂർ ഊർജമാണ് ആവശ്യമായി വരുന്നതെന്നും റിപ്പോർട്ടിൽ പറയുന്നു. പരമ്പരാഗത രീതികളിൽ ഉപയോഗിക്കുന്ന സയനൈഡ്, മെർക്കുറി പോലുള്ള വിഷാംശമുള്ള രാസവസ്തുക്കൾ ഒഴിവാക്കാൻ ഈ സാങ്കേതികവിദ്യ സഹായിക്കും.
വീണ്ടെടുക്കുന്ന സ്വർണം ഉയർന്ന മൂല്യമുള്ള ഇലക്ട്രോണിക് ഉപകരണങ്ങളുടെ നിർമാണത്തിൽ വീണ്ടും ഉപയോഗിക്കാനാകും. ഇതിലൂടെ പുതിയ സ്വർണം ഖനനം ചെയ്യേണ്ടതിന്റെ ആവശ്യകത കുറയ്ക്കാനും ഇലക്ട്രോണിക് മാലിന്യത്തിന്റെ പുനരുപയോഗം പ്രോത്സാഹിപ്പിക്കാനും സാധിക്കുമെന്നാണ് പ്രതീക്ഷ.
പദ്ധതി ലബോറട്ടറി ഘട്ടത്തിൽനിന്ന് വ്യാവസായിക ഉൽപ്പാദനത്തിലേക്കും വാണിജ്യാടിസ്ഥാനത്തിലുള്ള ഉപയോഗത്തിലേക്കും എത്തിക്കുന്നതിനായി വ്യവസായ പങ്കാളികളെ തേടുകയാണ് ഗവേഷകസംഘം.
ഗർഭപരിശോധനയിൽ കൂടുതൽ കൃത്യമായ ഫലം നൽകുന്ന ഉപകരണം
ദുബായ് ഫ്യൂച്ചർ വീക്കിൽ ശ്രദ്ധ നേടിയ മറ്റൊരു പദ്ധതിയാണ് അമേരിക്കയിലെ ജോർജിയ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ ഗവേഷകർ വികസിപ്പിച്ചെടുത്ത Della Dx. സാധാരണ ഗർഭപരിശോധനാ കിറ്റുകൾ ഗർഭമുണ്ടോ ഇല്ലയോ എന്ന വിവരം മാത്രമാണ് നൽകുന്നത്. എന്നാൽ ശരീരത്തിലെ പ്രത്യേക ഘടകങ്ങളുടെ അളവ് തിരിച്ചറിയാൻ കഴിയുന്ന പരിശോധനാ സംവിധാനമാണ് ഈ പദ്ധതിയുടെ ലക്ഷ്യം.
കോശത്തിന് പുറത്തുള്ള ജൈവ സംവിധാനങ്ങൾ ഉപയോഗിച്ച് പ്രത്യേക പ്രോട്ടീനുകളെ തിരിച്ചറിയുകയും അവയുടെ അളവനുസരിച്ച് നിറവ്യത്യാസം സൃഷ്ടിക്കുകയും ചെയ്യുന്ന രീതിയിലാണ് ഉപകരണം പ്രവർത്തിക്കുന്നത്. ആദ്യഘട്ടത്തിൽ ഗർഭാവസ്ഥയുമായി ബന്ധപ്പെട്ട HCG ഹോർമോണിന്റെ അളവ് നിരീക്ഷിക്കുന്നതിനാണ് പദ്ധതി ശ്രദ്ധ കേന്ദ്രീകരിക്കുന്നത്.
ആവശ്യമായ നിയന്ത്രണാനുമതികൾ ലഭിച്ചാൽ ഏകദേശം അഞ്ച് വർഷത്തിനുള്ളിൽ ഉൽപ്പന്നം വിപണിയിലെത്തിക്കാനാകുമെന്നാണ് ഗവേഷകസംഘത്തിന്റെ പ്രതീക്ഷ.
കടുത്ത ചൂടിൽ ജോലി ചെയ്യുന്നവർക്ക് കൂളിങ് കോളർ
അമിതമായ ചൂടിൽ പുറംജോലികളിലും ഫാക്ടറികളിലും ജോലി ചെയ്യുന്നവരുടെ സുരക്ഷ ലക്ഷ്യമിട്ട് അമേരിക്കയിലെ പെൻസിൽവാനിയ സർവകലാശാലയിലെ ഗവേഷകർ വികസിപ്പിച്ചെടുത്ത ഉപകരണമാണ് Mexar Vapour.
കഴുത്തിൽ ധരിക്കാവുന്ന ഈ കൂളിങ് ഉപകരണം ചർമത്തിന്റെ താപനില കുറയ്ക്കാനും ശാരീരിക അധ്വാനത്തിനിടയിലെ ചൂടിന്റെ ആഘാതം കുറയ്ക്കാനും സഹായിക്കുന്നു. തൊഴിലാളികളുടെ ശരീരത്തിലെ ചൂട് നിരീക്ഷിച്ച് തത്സമയ സുരക്ഷാ മുന്നറിയിപ്പുകൾ നൽകുന്ന സംവിധാനവും ഇതോടൊപ്പമുണ്ട്.
ചൂടും ഈർപ്പവും കൂടുതലുള്ള സാഹചര്യങ്ങളിൽ നിർമാണത്തൊഴിലാളികളിൽ ഈ സംവിധാനം പരീക്ഷിച്ചിട്ടുണ്ട്. ചൂട് മൂലമുള്ള ആരോഗ്യപ്രശ്നങ്ങളുടെ സാധ്യത കുറയ്ക്കുന്നതിനും തൊഴിലിടങ്ങളിലെ സുരക്ഷ മെച്ചപ്പെടുത്തുന്നതിനും ഇത് സഹായിക്കുമെന്നാണ് ഗവേഷകരുടെ വിലയിരുത്തൽ.
ദുബായ് ഫ്യൂച്ചർ വീക്കിൽ നൂറോളം പദ്ധതികൾ
നവംബർ 18 മുതൽ 21 വരെ നടന്ന ദുബായ് ഫ്യൂച്ചർ വീക്കിന്റെ ഭാഗമായി ലോകത്തിന്റെ വിവിധ ഭാഗങ്ങളിൽ നിന്നുള്ള സർവകലാശാല വിദ്യാർഥികളും സമീപകാല ബിരുദധാരികളും വികസിപ്പിച്ച നൂറോളം പദ്ധതികളാണ് പ്രദർശിപ്പിച്ചത്. ആരോഗ്യം, ഊർജം, വിഭവസംരക്ഷണം, സർക്കുലർ ഇക്കോണമി, നഗരങ്ങളുടെ ഭാവി തുടങ്ങിയ മേഖലകളിലെ വെല്ലുവിളികൾക്ക് പരിഹാരം കണ്ടെത്തുകയാണ് പദ്ധതികളുടെ ലക്ഷ്യം.





