
Qatar private school licence 2027-2028 ദോഹ: 2027-2028 അധ്യയന വർഷത്തേക്ക് ഖത്തറിൽ സ്വകാര്യ സ്കൂളുകളും കിന്റർഗാർട്ടനുകളും ആരംഭിക്കുന്നതിനുള്ള ലൈസൻസിന് അപേക്ഷ ക്ഷണിച്ച് വിദ്യാഭ്യാസ ഉന്നത വിദ്യാഭ്യാസ മന്ത്രാലയം. അംഗീകൃത നിബന്ധനകളും ആവശ്യമായ രേഖകളും പാലിച്ചാണ് അപേക്ഷ സമർപ്പിക്കേണ്ടത്. രാജ്യത്തെ വിദ്യാഭ്യാസ മേഖലയിൽ കൂടുതൽ അവസരങ്ങളും വൈവിധ്യമാർന്ന പഠനരീതികളും ഉറപ്പാക്കുന്നതിന്റെ ഭാഗമായാണ് പുതിയ നടപടി.
അപേക്ഷിക്കാനുള്ള യോഗ്യതകൾ
- അപേക്ഷകൻ വിദ്യാഭ്യാസ ഉന്നത വിദ്യാഭ്യാസ മന്ത്രാലയത്തിലോ അതിന് കീഴിലുള്ള സ്ഥാപനങ്ങളിലോ ജോലി ചെയ്യുന്ന വ്യക്തിയായിരിക്കരുത്.
- അപേക്ഷകന് കുറഞ്ഞത് 21 വയസ് പ്രായമുണ്ടായിരിക്കണം.
- വ്യക്തിഗത തിരിച്ചറിയൽ കാർഡിന്റെ (QID) പകർപ്പ് സമർപ്പിക്കണം.
മുൻഗണന നൽകുന്ന വിദ്യാഭ്യാസ പാഠ്യപദ്ധതികൾ
പുതിയ സ്വകാര്യ സ്കൂളുകൾക്കും കിന്റർഗാർട്ടനുകൾക്കും ലൈസൻസ് അനുവദിക്കുമ്പോൾ താഴെ പറയുന്ന പാഠ്യപദ്ധതികൾക്ക് മന്ത്രാലയം മുൻഗണന നൽകും.
- ദേശീയ നിലവാരത്തിലുള്ള പാഠ്യപദ്ധതി
- അമേരിക്കൻ പാഠ്യപദ്ധതി
- ഇന്റർനാഷണൽ ബാക്കലറിയേറ്റ് (IB)
- ഫ്രഞ്ച് പാഠ്യപദ്ധതി
- സിറിയൻ പാഠ്യപദ്ധതി
- ഈജിപ്ഷ്യൻ പാഠ്യപദ്ധതി
- ടുണീഷ്യൻ പാഠ്യപദ്ധതി
- ഫിലിപ്പീൻ പാഠ്യപദ്ധതി
- പാകിസ്ഥാൻ പാഠ്യപദ്ധതി
- ഇന്ത്യൻ പാഠ്യപദ്ധതി
അപേക്ഷിക്കേണ്ട അവസാന തീയതി
2026 ഡിസംബർ 31 ആണ് അപേക്ഷ സമർപ്പിക്കാനുള്ള അവസാന തീയതി. ഖത്തർ വിദ്യാഭ്യാസ ഉന്നത വിദ്യാഭ്യാസ മന്ത്രാലയത്തിന് കീഴിലുള്ള സ്വകാര്യ വിദ്യാഭ്യാസ സ്ഥാപനങ്ങളുടെ ലൈസൻസിങ് പ്ലാറ്റ്ഫോം വഴി ഓൺലൈനായി അപേക്ഷ സമർപ്പിക്കണം.
ഖത്തറിലെ വിദ്യാഭ്യാസ മേഖലയിൽ കൂടുതൽ വൈവിധ്യമാർന്ന പഠനസൗകര്യങ്ങൾ ഒരുക്കുന്നതിനും സമൂഹത്തിന്റെ വിദ്യാഭ്യാസ ആവശ്യങ്ങൾ നിറവേറ്റുന്നതിനുമാണ് മന്ത്രാലയത്തിന്റെ ഈ നീക്കം.





