
ദോഹ: പുതിയ ദ്രവീകൃത പ്രകൃതിവാതക (എൽഎൻജി) വാഹകക്കപ്പൽ സ്വീകരിക്കാനൊരുങ്ങി ഖത്തർ എനർജി. 174,000 ക്യുബിക് മീറ്റർ ശേഷിയുള്ള ‘ഹാസം ബർണൂഷ്’ (Hasam Barnyoush) എന്ന കപ്പലാണ് ഖത്തർ എനർജിയുടെ ഭാഗമാകുന്നത്.
നോർവീജിയൻ കമ്പനിയായ നട്ട്സെൻ (Knutsen) ഗ്രൂപ്പിന്റെ നിർമാണ പദ്ധതിയുടെ ഭാഗമായി ദക്ഷിണ കൊറിയയിലെ ഹ്യുണ്ടായ് ഹെവി ഇൻഡസ്ട്രീസ് (HHI) കപ്പൽശാലയിലാണ് കപ്പൽ നിർമിച്ചത്. നിർമാണ നടപടികൾ പൂർത്തിയാക്കിയതിനെത്തുടർന്ന് കപ്പൽ ഖത്തർ എനർജിക്ക് കൈമാറാനുള്ള നടപടികളാണ് പുരോഗമിക്കുന്നത്.
നട്ട്സെൻ പദ്ധതിയുടെ ഭാഗമായി കൊറിയൻ കപ്പൽശാലയിൽ നിർമിക്കുന്ന പത്ത് എൽഎൻജി ടാങ്കറുകളിൽ അവസാനത്തേതാണ് ‘ഹാസം ബർണൂഷ്’. 174,000 ക്യുബിക് മീറ്റർ സംഭരണശേഷിയുള്ള ഈ കപ്പൽ ഖത്തറിന്റെ എൽഎൻജി ഗതാഗത ശേഷി ശക്തിപ്പെടുത്തുന്നതിൽ പ്രധാന പങ്കുവഹിക്കുമെന്നാണ് പ്രതീക്ഷിക്കുന്നത്.
ഖത്തറിന്റെ പ്രകൃതിവാതക കയറ്റുമതി ശേഷി വർധിപ്പിക്കുന്നതിനും ആഗോള ഊർജ വിപണിയിൽ രാജ്യത്തിന്റെ സാന്നിധ്യം കൂടുതൽ ശക്തമാക്കുന്നതിനുമുള്ള വിപുലമായ കപ്പൽവ്യൂഹ വികസന പദ്ധതികളുടെ ഭാഗമായാണ് പുതിയ കപ്പൽ എത്തുന്നത്.





