
Dubai’s Palm Jumeirah VIP Parking Zone Charge ദുബായ്: ദുബായിലെ പ്രമുഖ വിനോദസഞ്ചാര കേന്ദ്രമായ പാം ജുമൈറയിൽ വാഹന പാർക്കിങ്ങിന് മണിക്കൂറിന് 50 ദിർഹം നിരക്ക് ഏർപ്പെടുത്തി. പാം ജുമൈറയിലെ പ്രത്യേക VIP സ്ട്രീറ്റ് പാർക്കിങ് മേഖലയിലാണ് പുതിയ നിരക്ക് നിലവിൽ വന്നത്. നവംബർ 4 മുതൽ പ്രാബല്യത്തിൽ വന്ന ഈ സംവിധാനം ആഴ്ചയിൽ ഏഴു ദിവസവും 24 മണിക്കൂറും ബാധകമാണ്. വാരാന്ത്യങ്ങളിലും പൊതു അവധി ദിവസങ്ങളിലും നിരക്കിൽ മാറ്റമില്ലെന്ന് പാർക്കിങ് സേവനദാതാക്കളായ പാർക്കോണിക് (Parkonic) അറിയിച്ചു.
പാം ജുമൈറയിലെ P118 എന്ന കോഡ് നൽകിയിരിക്കുന്ന പാർക്കിങ് മേഖലയിലാണ് മണിക്കൂറിന് 50 ദിർഹം ഈടാക്കുന്നത്. അറ്റ്ലാന്റിസ് ദി പാം, അറ്റ്ലാന്റിസ് ദി റോയൽ തുടങ്ങിയ ആഡംബര ഹോട്ടലുകൾക്ക് സമീപമുള്ള പ്രദേശമാണിത്. ഓരോ മണിക്കൂറിനും അല്ലെങ്കിൽ ഒരു മണിക്കൂറിന്റെ ഭാഗത്തിനും മുഴുവൻ മണിക്കൂറിന്റെ നിരക്ക് ബാധകമായിരിക്കും.
സാലിക് അക്കൗണ്ട് വഴി പണം ഈടാക്കും
പാർക്കിങ്ങിനുള്ള പണം രണ്ട് രീതിയിൽ അടയ്ക്കാം. പാർക്കിങ് സ്ഥലത്തെ ബോർഡിൽ നൽകിയിരിക്കുന്ന നിർദേശങ്ങൾ അനുസരിച്ച് SMS വഴി പാർക്കിങ് സെഷൻ ആരംഭിക്കാം. SMS പേയ്മെന്റ് ആരംഭിച്ചിട്ടില്ലെങ്കിൽ വാഹനത്തിന്റെ സാലിക് അക്കൗണ്ടിൽനിന്ന് വാഹനം പുറത്തുപോകുമ്പോൾ പാർക്കിങ് തുക സ്വമേധയാ ഈടാക്കും. ഇത് സാലിക്കിന്റെ നിബന്ധനകൾക്ക് വിധേയമാണ്.
സാലിക് അക്കൗണ്ട് ഇല്ലാത്തവരും അക്കൗണ്ടിൽ മതിയായ ബാലൻസ് ഇല്ലാത്തവരും SMS വഴി പണം അടയ്ക്കണം. SMS സേവനത്തിന് അധിക നിരക്കുകൾ ബാധകമായേക്കാം.
ക്യാഷ്, QR കോഡ് പേയ്മെന്റുകൾ ലഭ്യമല്ല
ഈ പാർക്കിങ് മേഖലയിൽ ക്യാഷ് പേയ്മെന്റ്, പാർക്കിങ് മെഷീനുകൾ, QR കോഡ് എന്നിവ വഴി പണം അടയ്ക്കാനുള്ള സൗകര്യമില്ലെന്ന് പാർക്കോണിക് വ്യക്തമാക്കി. ടിക്കറ്റ് രഹിത സംവിധാനമാണ് ഇവിടെ പ്രവർത്തിക്കുന്നത്. വാഹനത്തിന്റെ നമ്പർ പ്ലേറ്റ് തന്നെയാണ് ഡിജിറ്റൽ പാർക്കിങ് രേഖയായി ഉപയോഗിക്കുന്നത്.
പാർക്കിങ് നിരക്ക് അടയ്ക്കാത്ത വാഹനങ്ങൾക്കെതിരെ പിഴ, ബ്ലാക്ക്ലിസ്റ്റിങ്, നിയമനടപടി തുടങ്ങിയ നടപടികൾ സ്വീകരിക്കാമെന്നും ഓപ്പറേറ്റർ മുന്നറിയിപ്പ് നൽകിയിട്ടുണ്ട്.
എല്ലാ വാഹനങ്ങൾക്കും നിരക്ക് ബാധകം
പീപ്പിൾ ഓഫ് ഡിറ്റർമിനേഷൻ (POD) വിഭാഗത്തിൽ രജിസ്റ്റർ ചെയ്ത വാഹനങ്ങൾ ഉൾപ്പെടെ എല്ലാ വാഹനങ്ങൾക്കും മണിക്കൂറിന് 50 ദിർഹം നിരക്ക് ബാധകമാണ്. ഈ മേഖലയിലെ പാർക്കിങ് ഉപയോഗിക്കുന്നവർ വാഹനമിറക്കുന്നതിന് മുമ്പ് സ്ഥലത്തെ നിരക്കുകളും പേയ്മെന്റ് നിർദേശങ്ങളും പരിശോധിക്കണമെന്ന് അധികൃതർ അറിയിച്ചു.





