Dubai Visa Fraud;ദുബായ്: തൊഴിൽവീസ വാഗ്ദാനം ചെയ്ത് പണം തട്ടിയതിന് പിന്നാലെ ഉയർന്ന പലിശയ്ക്ക് പണം നൽകുന്ന ബ്ലേഡ് മാഫിയയുടെ കെണിയിലും അകപ്പെട്ട് ദുരിതജീവിതം നയിക്കുകയാണ് യുഎഇയിലെ ഒരു മലയാളി യുവതി. വർഷങ്ങളായി പ്രവാസജീവിതം നയിച്ചിട്ടും സാമ്പത്തിക പ്രതിസന്ധികളിൽനിന്ന് കരകയറാൻ കഴിയാത്ത യുവതി ഇപ്പോൾ കടുത്ത ഭീഷണികളും മാനസിക സമ്മർദങ്ങളും നേരിടുകയാണ്. ഷാർജയിൽ സുഹൃത്തിനൊപ്പം കഴിയുന്ന യുവതി തന്റെ ദുരിതാനുഭവങ്ങൾ പങ്കുവച്ചു.

തൊഴിൽവീസയുടെ പേരിൽ പണം തട്ടി

സ്കൂളിൽ ഒരുമിച്ച് പഠിച്ചിരുന്ന സഹപാഠിയെ 30 വർഷത്തിന് ശേഷം ദുബായിലെ കരാമയിൽവച്ച് കണ്ടുമുട്ടിയതാണ് യുവതിയുടെ ജീവിതത്തിൽ വലിയ പ്രതിസന്ധികൾക്ക് തുടക്കമായത്. പരിചയമുള്ള കമ്പനിയിൽ തൊഴിൽവീസ ശരിയാക്കാമെന്ന് വാഗ്ദാനം ചെയ്ത് 9,000 ദിർഹമാണ് ഇയാൾ ആവശ്യപ്പെട്ടത്. ആദ്യഘട്ടത്തിൽ ഒന്നര ലക്ഷം രൂപ നൽകിയാൽ മതിയെന്നും ബാക്കി തുക പിന്നീട് ജോലി ചെയ്ത് നൽകിയാൽ മതിയെന്നുമായിരുന്നു വാഗ്ദാനം.

ഇതിൽ വിശ്വസിച്ച യുവതി നാട്ടിൽനിന്ന് പലരിൽനിന്നും കടം വാങ്ങിയും സ്വർണം പണയംവച്ചും പണം കണ്ടെത്തി നൽകി. എന്നാൽ വാഗ്ദാനം ചെയ്ത സമയത്ത് വീസ ലഭിച്ചില്ല. പിന്നീട് വീസയുമായി ബന്ധപ്പെട്ട മറ്റൊരു വ്യക്തിയെ ബന്ധപ്പെട്ടപ്പോഴാണ് താൻ നൽകിയ മുഴുവൻ തുകയും ഇയാൾക്ക് ലഭിച്ചിട്ടില്ലെന്ന് അറിയുന്നത്.

തുടർന്ന് വീണ്ടും 78,000 രൂപയോളം കടം വാങ്ങി നൽകിയെങ്കിലും നടപടികൾ നീണ്ടുപോയി. ഒടുവിൽ വീസ ലഭിച്ചെങ്കിലും കോഴിക്കോട് വിമാനത്താവളത്തിൽ എമിഗ്രേഷൻ പ്രശ്നത്തെ തുടർന്ന് യാത്ര തടസ്സപ്പെട്ടു. പിന്നീട് തടസ്സങ്ങൾ പരിഹരിച്ചാണ് യുവതി യുഎഇയിലേക്ക് തിരിച്ചെത്തിയത്.

വീസയ്ക്കായി വീണ്ടും പണം, പിന്നാലെ കടക്കെണി

യുവതിക്ക് ലഭിച്ച വീസയുമായി ബന്ധപ്പെട്ട നടപടികൾ പൂർത്തിയാക്കാൻ കൂടുതൽ പണം ആവശ്യപ്പെട്ടതോടെ പ്രതിസന്ധി രൂക്ഷമായി. എമിറേറ്റ്സ് ഐഡി ഉൾപ്പെടെയുള്ള താമസരേഖകൾ ലഭിക്കുന്നതിനായി വീണ്ടും പണം കണ്ടെത്തേണ്ടിവന്നു.

ഇതിനിടെ ജോലി ലഭിക്കാത്തതും വരുമാനം കുറഞ്ഞതും ജീവിതം കൂടുതൽ ദുരിതത്തിലാക്കി. താമസം, ഭക്ഷണം, നാട്ടിലുള്ള പ്രായമായ അമ്മയുടെ ചെലവുകൾ, സ്വർണം പണയംവച്ചുണ്ടായ ബാധ്യതകൾ എന്നിവയെല്ലാം യുവതിക്ക് വലിയ സാമ്പത്തിക ഭാരമായി.

2,000 ദിർഹം കടം; മാസം 200 ദിർഹം പലിശ

സാമ്പത്തിക പ്രതിസന്ധി രൂക്ഷമായതോടെ പരിചയക്കാരിയായ ഒരു സ്ത്രീ വഴിയാണ് യുവതി ദുബായിലെ കരാമയിൽ പ്രവർത്തിക്കുന്ന മലയാളികളുടെ ബ്ലേഡ് മാഫിയയുടെ വലയിലെത്തിയത്. ആദ്യം 2,000 ദിർഹമാണ് കടമായി വാങ്ങിയത്. എന്നാൽ ഇതിന് പ്രതിമാസം 200 ദിർഹം പലിശ നൽകണമെന്നായിരുന്നു വ്യവസ്ഥ.

പിന്നീട് പഴയ കടം വീട്ടുന്നതിനും മറ്റ് ആവശ്യങ്ങൾക്കുമായി ഉയർന്ന പലിശയ്ക്ക് വീണ്ടും പണം കടം വാങ്ങേണ്ടിവന്നു. ഒരു ഘട്ടത്തിൽ പ്രതിദിനം 50 ദിർഹം പലിശ നൽകേണ്ട സാഹചര്യമുണ്ടായി. ജോലി നഷ്ടപ്പെട്ടതോടെ പലിശ അടയ്ക്കാൻ പോലും കഴിയാതെയായി.

പണം തിരിച്ചുനൽകാൻ കഴിയാത്തതിനെ തുടർന്ന് നിരന്തരമായ ഭീഷണി കോളുകൾ ലഭിക്കുന്നതായും യുവതി പറയുന്നു. ബ്ലേഡ് മാഫിയയുടെ സമ്മർദം കാരണം കരാമയിലെ ജോലി ഉപേക്ഷിക്കേണ്ടിവന്നതായും അവർ വെളിപ്പെടുത്തി.

സഹായം തേടി യുവതി

നിലവിൽ ഷാർജയിൽ ഒരു സുഹൃത്തിനൊപ്പം കഴിയുന്ന യുവതി കടുത്ത മാനസിക സമ്മർദത്തിലാണ്. ഉയർന്ന പലിശ ഒഴിവാക്കാനും കടം തിരിച്ചടയ്ക്കാൻ സാവകാശം ലഭിക്കാനും ഇന്ത്യൻ നയതന്ത്രകാര്യാലയങ്ങളുടെയും സന്നദ്ധസംഘടനകളുടെയും സഹായം തേടുകയാണ് ഇവർ.

ജോലി ചെയ്ത് കടമായി വാങ്ങിയ തുക ഘട്ടംഘട്ടമായി തിരിച്ചടയ്ക്കാൻ തയ്യാറാണെന്നും യുവതി വ്യക്തമാക്കുന്നു.

പ്രവാസികൾക്കിടയിൽ പിടിമുറുക്കി ബ്ലേഡ് മാഫിയ

യുഎഇയിലെ കുറഞ്ഞ വരുമാനക്കാരായ പ്രവാസികളെ ലക്ഷ്യമിട്ട് പ്രവർത്തിക്കുന്ന അനധികൃത പണമിടപാട് സംഘങ്ങൾ വലിയ ആശങ്കയാണ് സൃഷ്ടിക്കുന്നത്. ദുബായിലെ ബർ ദുബായ്, കരാമ മേഖലകൾ കേന്ദ്രീകരിച്ച് പ്രവർത്തിക്കുന്ന ഇത്തരം സംഘങ്ങളുടെ കെണിയിൽ മലയാളികൾ ഉൾപ്പെടെ മുന്നൂറിലധികം ഇന്ത്യൻ പ്രവാസികൾ അകപ്പെട്ട സംഭവവും നേരത്തെ റിപ്പോർട്ട് ചെയ്യപ്പെട്ടിരുന്നു.

ഉയർന്ന പലിശയ്ക്ക് പണം നൽകുന്നതിനൊപ്പം ഈടായി ഒപ്പിട്ട ബ്ലാങ്ക് ചെക്കുകൾ വാങ്ങുകയും പിന്നീട് തുക വർധിപ്പിച്ച് വ്യാജ ചെക്ക് കേസുകൾ നൽകുകയും ചെയ്യുന്നതായാണ് ഇരകളുടെ ആരോപണം. പണം തിരിച്ചടച്ചിട്ടും കേസുകളുടെയും യാത്രാവിലക്കുകളുടെയും പേരിൽ ദുരിതത്തിലായ നിരവധി പ്രവാസികളുണ്ടെന്നാണ് റിപ്പോർട്ടുകൾ.

ഇരകൾക്ക് സൗജന്യ നിയമസഹായം ലഭ്യമാക്കുക, വ്യാജ ചെക്ക് കേസുകളിൽ കുടുങ്ങിയവരുടെ യാത്രാവിലക്കുകൾ നീക്കാൻ നയതന്ത്ര ഇടപെടൽ നടത്തുക, അടിയന്തര താമസ-ഭക്ഷണ സൗകര്യങ്ങൾ ഉറപ്പാക്കുക തുടങ്ങിയ ആവശ്യങ്ങളും അധികൃതരുടെ ശ്രദ്ധയിൽപ്പെടുത്തിയിട്ടുണ്ട്.

കടുത്ത സാമ്പത്തിക പ്രതിസന്ധികൾക്കിടയിൽ വിദേശത്ത് തൊഴിൽ തേടിയെത്തുന്ന സാധാരണക്കാരെ ലക്ഷ്യമിടുന്ന ഇത്തരം തട്ടിപ്പുകളും അനധികൃത പണമിടപാടുകളും പ്രവാസി സമൂഹത്തിന് വലിയ മുന്നറിയിപ്പാണ് നൽകുന്നത്.

യുഎഇയിലെ വാർത്തകളും പുതിയ തൊഴിലവസരങ്ങൾ അറിയാൻ ചാനൽ ഇപ്പോൾ തന്നെ ഫോളോ ചെയ്യൂ*