Temporary Closure of Al Bidda Station ദോഹ: ഖത്തറിലെ ദോഹ മെട്രോയിലെ അൽ ബിദ്ദ സ്റ്റേഷൻ നവംബർ 3 ചൊവ്വാഴ്ച രാത്രി താൽക്കാലികമായി അടച്ചിടുമെന്ന് ഖത്തർ റെയിൽ അറിയിച്ചു. രാജ്യവ്യാപകമായി നടത്തുന്ന ‘വതൻ 2026’ അഭ്യാസത്തിന്റെ ഭാഗമായാണ് നടപടി.
രാത്രി 8 മണി മുതൽ അന്നത്തെ സർവീസ് അവസാനിക്കുന്നതുവരെയാണ് സ്റ്റേഷൻ അടച്ചിടുക. ഇതേത്തുടർന്ന് ദോഹ മെട്രോയുടെ റെഡ്, ഗ്രീൻ ലൈനുകളിലെ ട്രെയിൻ സർവീസുകളെയും ബാധിച്ചേക്കും.
റെഡ്, ഗ്രീൻ ലൈനുകൾ തമ്മിൽ ബന്ധിപ്പിക്കുന്ന പ്രധാന ഇന്റർചേഞ്ച് സ്റ്റേഷനാണ് അൽ ബിദ്ദ. അതിനാൽ ഈ സ്റ്റേഷൻ വഴി യാത്ര ചെയ്യുന്നവർ യാത്രകൾ മുൻകൂട്ടി ആസൂത്രണം ചെയ്യണമെന്ന് ഖത്തർ റെയിൽ നിർദേശിച്ചു. യാത്രക്കാർക്ക് ഉണ്ടാകാവുന്ന അസൗകര്യത്തിൽ ഖത്തർ റെയിൽ ഖേദം പ്രകടിപ്പിക്കുകയും സഹകരണത്തിന് നന്ദി അറിയിക്കുകയും ചെയ്തു.
