Qatar US Iran Agreement : ദോഹ: അമേരിക്കയും ഇറാനും തമ്മിൽ ധാരണയിലെത്തുന്നതിൽ പരാജയപ്പെട്ടെന്ന തരത്തിൽ ഖത്തർ പ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് മുഹമ്മദ് ബിൻ അബ്ദുറഹ്മാൻ അൽ താനി പറഞ്ഞതായി പ്രചരിക്കുന്ന വാർത്തകൾ വ്യാജവും തെറ്റിദ്ധരിപ്പിക്കുന്നതുമാണെന്ന് ഖത്തറിന്റെ ഇന്റർനാഷണൽ മീഡിയ ഓഫീസ് വ്യക്തമാക്കി.
2026 നവംബർ 7നാണ് ഇതുസംബന്ധിച്ച് മീഡിയ ഓഫീസ് ഔദ്യോഗിക പ്രസ്താവന പുറത്തിറക്കിയത്. പ്രധാനമന്ത്രിയുടെ പരാമർശങ്ങൾ ബോധപൂർവം വളച്ചൊടിച്ചാണ് ഇത്തരം വാർത്തകൾ പ്രചരിപ്പിക്കുന്നതെന്ന് പ്രസ്താവനയിൽ പറയുന്നു.
മേഖലയിൽ യുദ്ധവും അസ്ഥിരതയും തുടരുന്നതിൽ താൽപര്യമുള്ളവരാണ് ഇത്തരം തെറ്റായ പ്രചാരണങ്ങൾക്ക് പിന്നിലെന്നും മീഡിയ ഓഫീസ് ആരോപിച്ചു. നയതന്ത്ര ശ്രമങ്ങളെ ദുർബലപ്പെടുത്താനും സംഘർഷം കൂടുതൽ രൂക്ഷമാക്കാനും ലക്ഷ്യമിട്ട് വ്യാജ അക്കൗണ്ടുകൾ വഴി നിരവധി അവകാശവാദങ്ങൾ പ്രചരിക്കുന്നുണ്ടെന്നും പ്രസ്താവനയിൽ ചൂണ്ടിക്കാട്ടി.
അമേരിക്കയും ഇറാനും തമ്മിൽ ധാരണയിലെത്തിയിട്ടില്ലെന്നല്ല പ്രധാനമന്ത്രി പറഞ്ഞതെന്നും, ഇരുപക്ഷവും ഒരു കരാറിലെത്തുന്നതിനായി തുടർന്നും പ്രവർത്തിച്ചുകൊണ്ടിരിക്കുകയാണെന്നാണ് അദ്ദേഹം വ്യക്തമാക്കിയതെന്നും മീഡിയ ഓഫീസ് വിശദീകരിച്ചു.
അമേരിക്കയുമായും ഇറാനുമായും ഖത്തറിന്റെ മധ്യസ്ഥർ അടുത്ത ബന്ധം പുലർത്തുന്നുണ്ടെന്നും തുടരുന്ന ചർച്ചകൾക്ക് പിന്തുണ നൽകുന്നതിനായി ഏകോപനം തുടരുകയാണെന്നും പ്രസ്താവനയിൽ അറിയിച്ചു.
മേഖലയിൽ സമാധാനവും സ്ഥിരതയും ഉറപ്പാക്കുന്നതിനുള്ള നയതന്ത്ര ശ്രമങ്ങൾ തുടരുന്നതിനിടെയാണ് പ്രധാനമന്ത്രിയുടെ പ്രസ്താവനയെക്കുറിച്ച് തെറ്റായ വിവരങ്ങൾ പ്രചരിക്കുന്നതിനെതിരെ ഖത്തർ മീഡിയ ഓഫീസ് വിശദീകരണവുമായി രംഗത്തെത്തിയത്.
