ദുബായ്: യുഎഇയുടെ 55-ാമത് ദേശീയ ദിനാഘോഷമായ ഈദ് അൽ ഇത്തിഹാദിനോടനുബന്ധിച്ച് താമസക്കാർക്ക് അഞ്ച് ദിവസത്തെ തുടർച്ചയായ അവധി ലഭിക്കാൻ അവസരം. ഡിസംബർ 2, 3 തീയതികളിലാണ് ഈ വർഷത്തെ ദേശീയ ദിന അവധി പ്രതീക്ഷിക്കുന്നത്. ഔദ്യോഗിക അവധി തീയതികൾ ഇതുവരെ പ്രഖ്യാപിച്ചിട്ടില്ലെങ്കിലും, മുൻവർഷങ്ങളിലെ രീതിയനുസരിച്ച് ഈ തീയതികളിലായിരിക്കും അവധിയെന്നാണ് പ്രതീക്ഷ.

2026-ൽ ഡിസംബർ 2 ബുധനാഴ്ചയും ഡിസംബർ 3 വ്യാഴാഴ്ചയുമാണ്. ഇതിന് പിന്നാലെ വരുന്ന വാരാന്ത്യവും കൂടി കണക്കിലെടുത്താൽ ഡിസംബർ 2 മുതൽ 6 വരെ അഞ്ച് ദിവസത്തെ ഇടവേള ലഭിക്കാം. ഇതിനായി ജീവനക്കാർക്ക് ഡിസംബർ 4 വെള്ളിയാഴ്ച വാർഷിക അവധി എടുക്കേണ്ടിവരും.

അതേസമയം, വെള്ളിയാഴ്ച അധിക പൊതു അവധിയായി പ്രഖ്യാപിച്ചാൽ ജീവനക്കാർക്ക് വാർഷിക അവധി ഉപയോഗിക്കാതെ തന്നെ അഞ്ച് ദിവസത്തെ ഇടവേള ലഭിക്കും. എന്നാൽ ഇതുസംബന്ധിച്ച ഔദ്യോഗിക പ്രഖ്യാപനം ഇതുവരെ ഉണ്ടായിട്ടില്ല.

പൊതു അവധി മാറ്റാൻ നിയമത്തിൽ വ്യവസ്ഥ

2025-ൽ പാസാക്കിയ യുഎഇ നിയമപ്രകാരം ചില പൊതു അവധി ദിനങ്ങൾ ആഴ്ചയുടെ തുടക്കത്തിലേക്കോ അവസാനത്തിലേക്കോ മാറ്റാൻ സാധിക്കും. ആഴ്ചയുടെ മധ്യത്തിൽ വരുന്ന അവധികൾ വാരാന്ത്യവുമായി ചേർത്ത് കൂടുതൽ തുടർച്ചയായ അവധി ലഭ്യമാക്കുകയാണ് ഇതിന്റെ ലക്ഷ്യം.

എന്നാൽ ഈദ് അൽ ഇത്തിഹാദ് അവധി ഇത്തവണ മാറ്റുമോ എന്ന കാര്യത്തിൽ വ്യക്തതയില്ല. അതിനാൽ വെള്ളിയാഴ്ച അധിക അവധി പ്രഖ്യാപിക്കുമെന്ന പ്രതീക്ഷയിലാണു പല ജീവനക്കാരും.

ഷാർജയിലെ ചില ജീവനക്കാർക്ക് അഞ്ച് ദിവസം അവധി

ഷാർജയിലെ പൊതുമേഖലയിൽ നാല് ദിവസത്തെ പ്രവൃത്തി ആഴ്ച പിന്തുടരുന്ന ജീവനക്കാർക്ക് വാർഷിക അവധി ഉപയോഗിക്കാതെ തന്നെ വാരാന്ത്യത്തോടൊപ്പം അഞ്ച് ദിവസത്തെ ഇടവേള ലഭിക്കാനുള്ള സാധ്യതയുണ്ട്.

യാത്രാ പദ്ധതികൾ നേരത്തെ തയ്യാറാക്കാം

അഞ്ച് ദിവസത്തെ അവധി ലഭിച്ചാൽ വിദേശയാത്രയ്ക്കും കുടുംബത്തോടൊപ്പമുള്ള വിനോദയാത്രകൾക്കും താമസക്കാർക്ക് അവസരം ലഭിക്കും. എന്നാൽ അവധി അടുത്തെത്തുന്നതോടെ വിമാന ടിക്കറ്റ് നിരക്കുകളും ഹോട്ടൽ താമസച്ചെലവും ഉയരാൻ സാധ്യതയുണ്ട്.

യാത്രാ ഏജൻസികളുടെ വിലയിരുത്തലനുസരിച്ച്, അവധി കാലയളവിൽ യാത്രക്കാരുടെ തിരക്ക് വർധിക്കാനിടയുണ്ട്. ഇതിനകം തന്നെ ചിലർ കുറഞ്ഞ നിരക്കിലുള്ള വിമാന ടിക്കറ്റുകളും താമസസൗകര്യങ്ങളും ഉറപ്പാക്കാൻ ബുക്കിങ് ആരംഭിച്ചിട്ടുണ്ട്. അതിനാൽ യാത്ര ആസൂത്രണം ചെയ്യുന്നവർ മുൻകൂട്ടി ബുക്കിങ് നടത്തുന്നത് ഗുണകരമായിരിക്കും.

2024 മുതലാണ് യുഎഇ ദേശീയ ദിനാഘോഷങ്ങൾ ഈദ് അൽ ഇത്തിഹാദ് എന്ന പേരിൽ അറിയപ്പെടുന്നത്. ‘യൂണിയൻ ആഘോഷം’ എന്നർഥമുള്ള ഈ ആഘോഷത്തിന്റെ 55-ാമത് പതിപ്പാണ് 2026-ൽ നടക്കുന്നത്. യുഎഇയുടെ കുടുംബ വർഷത്തോടനുബന്ധിച്ച് രാജ്യത്തിന്റെ 55 വർഷത്തെ വളർച്ചയിൽ കുടുംബങ്ങളും തലമുറകളും സമൂഹങ്ങളും നൽകിയ സംഭാവനകൾക്കാണ് ഇത്തവണ പ്രാധാന്യം നൽകുന്നത്.

ശ്രദ്ധിക്കുക: ഡിസംബർ 2, 3 തീയതികളിലെ ദേശീയ ദിന അവധിയും ഡിസംബർ 4-ന് അധിക പൊതു അവധി ലഭിക്കുമെന്ന കാര്യവും സംബന്ധിച്ച ഔദ്യോഗിക പ്രഖ്യാപനം വരുന്നതുവരെ അവധി ക്രമീകരണങ്ങൾ സ്ഥിരീകരിച്ചതായി കണക്കാക്കരുത്.