Kuwait Digital Government Awards കുവൈത്ത് സിറ്റി: സർക്കാർ സേവനങ്ങൾ ഡിജിറ്റൽ സംവിധാനത്തിലേക്ക് മാറ്റുന്നതിൽ കൈവരിച്ച നേട്ടത്തിന് കുവൈത്തിന് രാജ്യാന്തര അംഗീകാരം. 2026-ലെ ഗൾഫ് ഡിജിറ്റൽ ഗവൺമെന്റ് അവാർഡിൽ രണ്ട് പ്രധാന പുരസ്‌കാരങ്ങളാണ് കുവൈത്ത് സ്വന്തമാക്കിയത്.
കുവൈത്തിന്റെ സർക്കാർ സേവന ആപ്പായ ‘സഹേൽ’ മികച്ച സമഗ്ര സർക്കാർ ആപ്പായി തിരഞ്ഞെടുക്കപ്പെട്ടു. നവജാത ശിശുക്കളുമായി ബന്ധപ്പെട്ട സർക്കാർ നടപടിക്രമങ്ങൾ ലളിതമാക്കുന്ന ‘ബേബി ജേർണി’ മികച്ച സർക്കാർ ഡിജിറ്റൽ സേവനത്തിനുള്ള പുരസ്‌കാരവും നേടി.
ബഹ്‌റൈനിൽ നടന്ന ജിസിസി രാജ്യങ്ങളുടെ ഏഴാമത് ഡിജിറ്റൽ ഗവൺമെന്റ് അവാർഡ് വിതരണച്ചടങ്ങിലാണ് കുവൈത്തിന്റെ ഇരട്ട നേട്ടം പ്രഖ്യാപിച്ചത്. വിവിധ സർക്കാർ വകുപ്പുകളെ ഏകോപിപ്പിച്ച് സേവനങ്ങൾ കൂടുതൽ വേഗത്തിലും ലളിതമായും ജനങ്ങളിലേക്ക് എത്തിക്കുന്നതിൽ രാജ്യം കൈവരിച്ച പുരോഗതിക്കുള്ള അംഗീകാരമായാണ് ഈ നേട്ടം വിലയിരുത്തപ്പെടുന്നത്.
നിലവിൽ 42 സർക്കാർ സ്ഥാപനങ്ങളുടെ സേവനങ്ങൾ സഹേൽ ആപ്പിലൂടെ ലഭ്യമാണെന്ന് ആപ്പിന്റെ എക്സിക്യൂട്ടീവ് കമ്മിറ്റി ചെയർമാൻ കേണൽ ബഷാർ അൽ സയ്യിദ് ഹാഷിം അറിയിച്ചു. സർക്കാർ വകുപ്പുകൾ തമ്മിലുള്ള ഏകോപനം ശക്തമാക്കാനും നടപടിക്രമങ്ങൾ ലളിതമാക്കാനും വിവര കൈമാറ്റം മെച്ചപ്പെടുത്താനും ആപ്പിന് കഴിഞ്ഞതായി അദ്ദേഹം വ്യക്തമാക്കി.
വിവിധ സർക്കാർ ആവശ്യങ്ങൾക്കായി ഓരോ ഓഫീസും കയറിയിറങ്ങേണ്ട സാഹചര്യം ഒഴിവാക്കി, നിരവധി വകുപ്പുകളുടെ സേവനങ്ങൾ ഒരൊറ്റ ഡിജിറ്റൽ പ്ലാറ്റ്‌ഫോമിൽ ലഭ്യമാക്കുകയാണ് സഹേലിന്റെ പ്രധാന ലക്ഷ്യം. ഇതിലൂടെ പൊതുജനങ്ങൾക്ക് സമയവും അധ്വാനവും ലാഭിക്കാനാകും.
അതേസമയം, നവജാത ശിശുക്കളുടെ ജനനവുമായി ബന്ധപ്പെട്ട സർക്കാർ നടപടിക്രമങ്ങൾ ഒരൊറ്റ സംവിധാനത്തിലൂടെ പൂർത്തിയാക്കാൻ സഹായിക്കുന്ന സേവനമാണ് ബേബി ജേർണി. കുഞ്ഞ് ജനിച്ചശേഷം വിവിധ സർക്കാർ ഓഫീസുകൾ പ്രത്യേകം സന്ദർശിക്കാതെ ആവശ്യമായ സേവനങ്ങൾ ഏകോപിതമായി ലഭ്യമാക്കുകയാണ് പദ്ധതിയുടെ ലക്ഷ്യം.
സർക്കാർ വകുപ്പുകൾ തമ്മിലുള്ള സാങ്കേതിക ഏകോപനവും വിവര കൈമാറ്റവും മെച്ചപ്പെടുത്തിയതിലൂടെ രേഖകൾ ആവർത്തിച്ച് സമർപ്പിക്കേണ്ട സാഹചര്യവും നടപടിക്രമങ്ങളിലെ കാലതാമസവും കുറയ്ക്കാൻ കഴിഞ്ഞതായി അധികൃതർ ചൂണ്ടിക്കാട്ടി.
ഡിജിറ്റൽ ഭരണസംവിധാനത്തെ കൂടുതൽ കാര്യക്ഷമവും ജനസൗഹൃദവുമാക്കാനുള്ള കുവൈത്തിന്റെ ശ്രമങ്ങൾക്ക് ലഭിച്ച വലിയ അംഗീകാരമായാണ് ഈ ഇരട്ട പുരസ്‌കാര നേട്ടം വിലയിരുത്തപ്പെടുന്നത്.
