Food Safety Violation in Kuwait കുവൈറ്റ് സിറ്റി: കുവൈറ്റിൽ ഭക്ഷ്യസുരക്ഷാ മാനദണ്ഡങ്ങൾ ലംഘിച്ച് ചീഞ്ഞഴുകിയ മീനുകളും മാംസവും വിപണനം ചെയ്യാൻ ശ്രമിച്ച ഭക്ഷ്യ സ്ഥാപനം അധികൃതർ അടപ്പിച്ചു. ജനറൽ അതോറിറ്റി ഫോർ ഫുഡ് ആൻഡ് ന്യൂട്രീഷനും ആഭ്യന്തര മന്ത്രാലയത്തിന്റെ ക്രിമിനൽ ഇൻവെസ്റ്റിഗേഷൻ ജനറൽ ഡിപ്പാർട്ട്‌മെന്റും സംയുക്തമായി നടത്തിയ പരിശോധനയിലാണ് വൻ തോതിലുള്ള ക്രമക്കേടുകൾ കണ്ടെത്തിയത്.
പരിശോധനയിൽ മനുഷ്യ ഉപയോഗത്തിന് തികച്ചും അനുയോജ്യമല്ലാത്ത 3 ടണ്ണും 548 കിലോഗ്രാമും വരുന്ന ഭക്ഷ്യവസ്തുക്കൾ അധികൃതർ പിടിച്ചെടുത്ത് നശിപ്പിച്ചു.
പഴകിയ മീനുകളുടെ കാലാവധി കഴിഞ്ഞ തീയതി മാറ്റി പുതിയത് രേഖപ്പെടുത്താൻ (Tampering with expiry dates) ശ്രമിച്ചതായി പരിശോധനയിൽ വ്യക്തമായി. ഒക്ടോബർ 15, 18 തീയതികളിൽ കാലാവധി കഴിഞ്ഞ പാക്കറ്റുകളും ഇതിൽ ഉൾപ്പെടുന്നു. പിടിച്ചെടുത്ത മീനുകൾക്ക് നിറവ്യത്യാസവും കേടായതിന്റെ ലക്ഷണങ്ങളും ദുർഗന്ധവും ഉണ്ടായിരുന്നു.
ശീതീകരിച്ച നിലയിലുള്ള ഇന്ത്യൻ എരുമയിറച്ചി (Frozen Indian buffalo meat) ഐസ് മാറ്റി ഉപയോഗിച്ച നിലയിലും, സ്വാഭാവിക ഗുണനിലവാരം നഷ്ടപ്പെട്ട് നിറം മാറിയും ദുർഗന്ധം വമിക്കുന്ന നിലയിലും കണ്ടെത്തി. പൊതുജനങ്ങളുടെ ആരോഗ്യം മുൻനിർത്തി ഇത്തരം കർശന പരിശോധനകൾ തുടരുമെന്നും നിയമം ലംഘിക്കുന്ന സ്ഥാപനങ്ങൾക്കെതിരെ വിട്ടുവീഴ്ചയില്ലാത്ത നടപടികൾ സ്വീകരിക്കുമെന്നും അധികൃതർ മുന്നറിയിപ്പ് നൽകി.
